KALANSEN 11
U ye sɛbɛri kɛ Yezu koo la
I ɲɛɛ be cɛɛ nunu na jaa nin kan wa?— Matiyo, Mariki, Luka, Zan, Piyɛri, Zaki, Zude ni Pol lo. U bɛɛ ye ɲɛnamaya kɛ wagati kelen na ni Yezu ye ani u ye koo dɔw sɛbɛ Yezu koo la. An ka kuma dɔɔni u koo la.
I be mun lo lɔn cɛɛ nunu koo la?
O cɛɛw la mɔgɔ saba tun ye cidenw ye ani u ye waajuli kɛ ni Yezu ye. I be o mɔgɔ saba nunu lɔn wa?— Matiyo ni Zan ani Piyɛri lo. Ciden Matiyo ni Zan tun be Yezu lɔn ka ɲɛ. U kelen kelen bɛɛ ye kitabu dɔ sɛbɛ ka Yezu ka ɲɛnamaya lakali. Ciden Zan ye kitabu wɛrɛ sɛbɛ min be weele ko Yirali. A fana ye lɛtɛrɛ saba sɛbɛ minw be weele ko Zan ka bataki fɔlɔ, Zan ka bataki filanan ani Zan ka bataki sabanan. Ciden Piyɛri ye lɛtɛrɛ fila sɛbɛ minw be sɔrɔ Bibulu kɔnɔ. U be weele ko Piyɛri ka bataki fɔlɔ ani Piyɛri ka bataki filanan. Jehova tora sankolo la ka kuma minw fɔ Yezu koo la, Piyɛri y’o sɛbɛ a ka bataki filanan kɔnɔ ko: ‘Nin ye ne Dencɛ ye, a koo ka di ne ye. A be ne dusu diya.’
Cɛɛ wɛrɛ minw be jaa nin kan, olu fana ye kitabu dɔw sɛbɛ walisa k’an kalan Yezu koo la. U la kelen ye Mariki ye. Tuma min na u nana Yezu minɛ, n’a sɔrɔ Mariki tun be yen ani koo minw bɛɛ kɛra, a ɲɛɛ lara u kan. Cɛɛ nunu dɔ ye Luka ye. Ale tun ye dɔgɔtɔrɔ ye. N’a sɔrɔ a kɛra kerecɛn ye Yezu sanin kɔ le.
Jaa nin kan, Yezu dɔgɔcɛ fila be yen. Olu fana ye Bibulu sɛbɛbagaw ye. I be u tɔgɔw lɔn wa?— U tɔgɔw ko Zaki ni Zude. A daminɛ na, u lanin tun tɛ Yezu la. U yɛrɛ tun b’a miiri ko a kuun wulila. Nka kɔfɛ, u lara Yezu la ani u kɛra kerecɛnw ye.
I ɲɛɛ be mɔgɔ laban min na jaa nin kan, ale fana ye Bibulu sɛbɛbaga dɔ ye. A tɔgɔ ko Pol. Sanni a ka kɛ kerecɛn ye, a tɔgɔ tun ko Sɔli. Kerecɛnw koo tun man di a ye fewu ani a y’u tɔɔrɔ kosɔbɛ. I b’a lɔn fɛɛn min y’a to Pol kɛra kerecɛn ye wa?— Loon dɔ, Pol tun be tagara dugu dɔ la. A barila ka kumakan dɔ mɛn ka bɔ sankolo la. Yezu kumakan tun lo! A ye Pol ɲininga ko: ‘Sɔli, Sɔli, mun na i be ne ka kalandenw tɔɔrɔla ten?’ O kɔ, Pol y’a sɔɔn yɛlɛma ani a kɛra kerecɛn ye. Pol ye Bibulu ka kitabu 14 sɛbɛ, k’a ta Ɔrɔmukaw ka kitabu ma ka taga a bila Eburuw ka kitabu ma.
An be Bibulu kalan loon o loon, tiɲɛn tɛ?— N’an be Bibulu kalan, an bena koo caaman lɔn Yezu koo la. I b’a fɛ ka dɔ lɔn tugun Yezu koo la wa?—
