¿Reechapa kuimbae reta mojaangape?... Jae retako Mateo, Marcos, Lucas, Juan, Pedro, Santiago, Judas jare Pablo. Jókuae kuimbae reta oikose Jesús iara rupi, jare oikuatía Jesús regua. Añave yayemboe jae retare.

Jae retagüi mboapɨ Jesús ivɨa ïru jare omoërakua Tumpa Iñee jae ndive. Jae retako jemimondo: Mateo, Juan jare Pedro. Eeka jae reta mojaangape. Mateo oikuatía metei tembikuatía Jesús oyapo vaere, Juan  jaenungavi. Juan oikuatíavi tembikuatía Revelación (ani Apocalipsis) jare mboapɨ tupapire reta jee vae: Tenonde Juan, mokoia Juan, jare mboapɨ Juan. Jemimondo Pedro oikuatía mókoi tupapire jee vae: Tenonde jare mokoia Pedro. Mokoia tupapirepe Pedro imiari mbae ikaviete oasa vae. Jae oendu Jehová imiari yave aragüi Jesúspe jare jei: “Kuaeko jae cheraɨ aaɨu yae vae. Chemboyerovia vae.”

Ïru kuimbae reta ñemojaangape oï vae oikuatíavi Jesúsre. Metei jaeko Marcos. Ipuereko oecha sundaro reta oipɨɨ yave Jesús. Ïru jemimondo Lucas. Jaeko oporopoano vae, ipuereko Jesús omano yave jae oiko cristiano rami.

Mókoi Jesús tɨvɨ reta oikuatíavi jesegua. ¿Reikuaa kiapa jae reta?... Ñemojaangape oï jae reta jee Santiago jare Judas. Tenonde mbaetɨ güɨrovia Jesús omboe vaere. ¡Jae reta güɨrovia jae imbokerema! Ërei jaɨkue rupi güɨrovia jese jare oyeapo jembiokuairä.

Añave ñanemiari Pablore. ¿Reechapa ñemojaangape? Ndei oiko yave cristiano rami jae jee Saulo. Jae omotareɨ yae cristiano reta ramo jeta oiporarauka chupe reta. ¿Reipotapa reikuaa kërai omboɨpɨ oiko Jesús jemimboe rami?... Metei ara, jae ojo tape rupi Damasco kotɨ yave, güɨramoiño oendu kia imiari aragüi. ¿Kiapa imiari aragüi? ¡Jesús imiari! Jare oparandu: “¿Maerapa reiporarauka güɨrovia vae reta chere?”. Jaɨkue rupi Pablo güɨrovia jese jare omboɨpɨ oiko cristiano rami. Pablo oikuatía 14 tembikuatía Bibliape, Romanos güive Hebreospe.

Yayeroviako yamongeta yave Biblia ara ñavo. Yamongeta yave Biblia yayemboe jeta mbae Jesús regua. ¿Reipotapa reikuaa ïru mbaembae Jesús regua?...