Ka metʼaʼ an inikchik axi tejwaʼ ti walekláb. Pél a Mateo, a Marcos, a Juan, a Pedro, a Santiago, a Judas ani a Pablo. Patalchik kʼwajiy tin kʼichájil a Jesús ani in dhuchaʼchik tin kwéntaj jajáʼ. An tʼilabchik ani an cartas axi jajáʼchik in dhuchaʼ kʼwajat ti an Biblia. ¿A léʼ ka exlaʼ más tin kwéntaj axéʼchik xi inik?...

Óx pélakchik i abatwále. ¿A ejtowal ti kin ólchij juʼtá ti kʼwajatchik ti an walekláb?... Pél a Mateo, a Juan, ani a Pedro. An abatwále Mateo ani a Juan in exlálakchik  lej alwaʼ a Jesús, ani kʼalejkʼij in dhuchaʼ jún i libro tin kwéntaj in ejatal a Jesús. A Juan jaye in dhuchaʼ an libro axi in bij Revelación (o Apocalipsis) ani óx i cartas axi in bij: Kʼaʼál, Tsabchíl ani Oxchíl a Juan. An abatwále Pedro in dhuchaʼ tsáb i cartas: Kʼaʼál, ani Tsabchíl a Pedro. Ti an tsabchíl carta, in ólnál tin kwéntaj jantʼoj lej exbadh. Jajáʼ in atsʼaʼ tam ti a Jehová káwin ma ti éb ani in uluw axéʼ tin kwéntaj a Jesús: «Játs u kʼán Tsakámil ani in lej kulbél kʼal jajáʼ».

Axi más an inikchik axi tejwaʼ ti walekláb jaye in dhuchaʼ tin kwéntaj a Jesús. Jún axi kʼwajat tejéʼ pél a Marcos. Walám jajáʼ in tsuʼuw tam ti yakʼwan a Jesús. Kʼeʼat pél a Lucas. Jajáʼ pélak i ilálix, ani walám wenkʼon ti belom o áykol tálbél tin tsémtal a Jesús.

Tsáb in epchal inik a Jesús axi waʼtsin tálbél jaye in dhuchaʼ tin kwéntaj jajáʼ. ¿A exlál jitaʼ játs?... Kʼwajatchik ti an walekláb, ani in bijak Santiago ani a Judas. Tin tujtal yabchik in belaʼ jawaʼ a Jesús in olnálak. ¡In bajuwchik kin tsalpay abal u olmanal! Pero tálbél in belaʼchik a Jesús ani wenkʼon ti áykol.

Xowéʼ ku káwin tin kwéntaj a Pablo. ¿A ejtowal ka tsuʼuw ti walekláb? Okʼxidh ka wenkʼon ti belom u bijiyabak Saulo. Jajáʼ in pojkálak an belomchik ani in lej odhnálak. ¿A léʼ ka exlaʼ jantʼiniʼ ti wenkʼon ti áykol kʼal a Jesús?... Jún i kʼícháj tam ti a Pablo neʼetsak ti bél jún jikʼtowál in atsʼaʼ abal tawnábak ma ti éb. ¿Kʼal jitaʼ ti tawnábak? ¡Pélak a Jesús! Ani in konówiy: «¿Jaleʼ ta lej odhnálchik axi belom kʼal nanáʼ?». A Pablo in tsuʼuw abal kwaʼalak kin jalkʼuy in tsalápil, ani jaxtám ti wenkʼon ti belom. Kʼal an kʼij, in dhuchaʼ 14 i libros axi ti Biblia, u tujél ti an carta a Romanos ma ti an carta a Hebreos.

¿Yab aníts abal i kulbétnál ki ajiy an Biblia chudhél chudhél?... Tanáʼ waʼats yán i tʼilab tin kwéntaj a Jesús. ¿Yab aníts abal a léʼ ka exlaʼ más tin kwéntaj jajáʼ?...