Сурэтым тет цІыхухэр плъагъурэ?~ Ахэр Маттэ́, Марк, Лука́, Иуа́н, Пётр, Екъу́б, Иу́дэ, Пау́л сымэщ. А цІыхухъухэр Хьисэ Мэссихь и зэманым псэуащ икІи абы и гъащІэм теухуауэ ятхыжащ. Абыхэм теухуауэ нэхъыбэ къэдгъащІэ.

А цІыхухъухэм щыщу щыр апостолу щытащ икІи Хьисэ и гъусэу хъыбарыфІыр ягъэІуащ. Абыхэм я цІэхэр пщІэрэ?~ Маттэ, Иуан, Пётрщ. Апостолу щыта Маттэрэ  Иуанрэ Хьисэ фІыуэ яцІыхуу щытащ икІи абы и гъащІэм теухуауэ тІуми тхылъ зэрыз ятхыжащ. Апостол Иуан иджыри Апокалипсис тхылъымрэ Япэ, ЕтІуанэ, Ещанэ Иуан тхылъхэмрэ итхащ. Апостол Пётри Библием хагъэува тхылъитІ итхыжащ: Япэ, ЕтІуанэ Пётр. Пётр и ЕтІуанэ тхылъым дэ къыщыдощІэ, Иеговэ Хьисэ теухуауэ мыпхуэдэ псалъэхэр зэрыжиІар: «Мыр фІыуэ слъагъу си къуэщ. Сэ абы срогушхуэ!»

Сурэтым щыплъагъу адрей цІыхухэми Хьисэ теухуауэ тхылъ ятхащ. Абыхэм щыщ зым МарккІэ еджэт. Абы езым илъэгъуауэ къыщІэкІынущ Хьисэ къызэраубыдар. НэгъуэщІым и цІэр Лукащ. Ар дохутыру щытащ икІи Хьисэ и лъэужь ирикІуэхэм ящыщ зы щыхъуар Хьисэ лІа иужьу къыщІэкІынщ.

Хьисэ теухуауэ иджыри зытхыжа цІыхухъуитІыр абы и къуэш нэхъыщІэу щытащ. ПщІэрэ абыхэм зэреджэу щытар?~ Екъубрэ Иудэрэщ. ЯпэщІыкІэ абыхэм Хьисэ я фІэщ хъутэкъым икІи абы и щхьэм зыгуэр илажьэу ягугъэт. Ауэ иужькІэ, ар я фІэщ хъуащ икІи и лъэужь иуващ.

Сурэтым иужьрейуэ щыплъагъур — Паулщ. Хьисэ и гъуэгу ирикІуэхэм ящыщ зы хъун ипэкІэ абы Щау́лкІэ еджэт. Абы Хьисэ и гъуэгу ирикІуэхэр илъагъу хъутэкъым икІи лей ярихт. Паул Хьисэ и гъуэгу ирикІуэхэм ящыщ зы щІэхъуар пщІэрэ?~ Зэгуэрым Паул Дама́ск кІуэуэ уафэм къиІукІыу макъ зэхихащ. Ар Хьисэ и макъырат! Ар Паул еупщІащ: «Си лъэужь ирикІуэхэр гугъу щІебгъэхьыр сыт?» Хьисэ и псалъэхэм Паул зихъуэжыну хуагъэушащ, икІи ар абы и лъэужь ирикІуэхэм ящыщ зы хъуащ. Паул Библием щыщ тхылъ 14 итхащ, Рим дэсхэм хуэгъэза тхылъым щыщІэдзауэ Евре́йхэм хуэгъэза тхылъым нэс.

Дэ Библием махуэ къэс доджэ, пэжкъэ?~ Библием дыщеджэм деж, Хьисэ теухуауэ куэд къыдощІэ. Хьисэ теухуауэ уэ нэхъыбэ къэпщІэну ухуей?~