Chaawil ebʼ li winq li wankebʼ saʼ li eetalil. Aʼan laj Mateo, laj Marcos, laj Lucas, laj Juan, laj Pedro, laj Santiago, laj Judas ut laj Pablo. Keʼwank chaq saʼ xkutankil li Jesus ut keʼtzʼiibʼak chirix. Chixjunil li keʼxtzʼiibʼa wank saʼ li Santil Hu. Ma taawaj xnawbʼal anihebʼ li winq aʼin?...

Oxibʼ rehebʼ li ramiiw ut ebʼ li Xʼapostol li Jesus keʼpuktesink rochbʼen. Ut aʼan laj Mateo, laj Juan ut laj Pedro. Ma naru nakaakʼut saʼ li eetalil anihebʼ li winq  aʼin?... Laj Mateo kixtzʼiibʼa jun li hu chirix li xyuʼam li Jesus, ut laj Juan ajwiʼ. Ut laj Juan kixtzʼiibʼa xhuhil Apocalipsis ut oxibʼ chik li hu li naxkʼabʼaʼi: Li xbʼeen, xkabʼ ut rox xhu laj Juan. Li Apostol Pedro kixtzʼiibʼa ajwiʼ wiibʼ li hu: Li xbʼeen ut xkabʼ xhu laj Pedro. Saʼ li xkabʼ xhu laj Pedro naxye naq li Jehobʼa kiʼaatinak saʼ choxa ut kixye chirix li Jesus: «Aʼan aʼin li walal. Kʼajoʼ ninra ut maaʼani chik joʼ aʼan».

Ut ebʼ li junchʼol chi winq keʼtzʼiibʼak chaq ajwiʼ chirix li Jesus. Jun rehebʼ aʼan laj Marcos. Ut maare kiril naq keʼxchap li Jesus. Ut li jun chik aʼan laj Lucas. Aʼan aj bʼanonel ut chanchan naq kamenaq chik li Jesus naq kiʼok choʼq aj paabʼanel malaj choʼq xtzolom li Jesus.

Wiibʼ li riitzʼin li Jesus keʼtzʼiibʼak ajwiʼ chirix. Ma nakaanaw anihebʼ?... Wankebʼ saʼ li eetalil, ut aʼan laj Santiago ut laj Judas. Saʼ xtiklajik inkʼaʼ keʼxpaabʼ li kixkʼut li Jesus. Keʼxkʼoxla naq kikanoʼk bʼayaq ru. Abʼan moqon chik, keʼok xpaabʼankil ut keʼok ajwiʼ choʼq xtzolom.

Anaqwan aatinaqo chirix laj Pablo. Ma nakaawil saʼ li eetalil? Aj Saulo xkʼabʼaʼ naq toj maajiʼ naʼok chaq choʼq aj paabʼanel. Xikʼ ut inkʼaʼ sa kirilebʼ laj paabʼanel. Ma taawaj xnawbʼal chanru kiʼok choʼq xtzolom li Jesus?... Saʼ jun kutan naq laj Saulo yook chaq chiru bʼe kirabʼi naq kiʼaatinaak saʼ choxa. Ani kiʼaatinank re? Aʼan li Jesus. Ut kixye re: «Kʼaʼut xikʼ yookat rilbʼalebʼ lintzolom?». Laj Pablo kixkʼe reetal naq tento tixjal xnaʼlebʼ. Joʼkan naq kiʼok choʼq aj paabʼanel. Ut moqon chik, kixtzʼiibʼa 14 li hu chalen Romanos toj Hebreos.

Peʼyaal naq nawulak chiqu rilbʼal li Santil Hu wulaj wulaj?... Chisaʼ wank naabʼal li naʼlebʼ chirix li Jesus. Peʼyaal naq nakaawaj xnawbʼal xkomon li naʼlebʼ chirix li Jesus?...