THUTO 11
Ba Ngwadile ka Jesu
Na o a ba bona banna ba ba lego mo seswantšhong?— Ke Mateo, Mareka, Luka, Johane, Petro, Jakobo, Juda le Paulo. Banna ba ka moka ba phetše nakong e tee le Jesu, le gona ba ngwadile ka yena. Anke re ithute ka bona.
O tseba eng ka banna ba?
Ba bararo ba bona e be e le baapostola bao ba ilego ba bolela ditaba tše dibotse le Jesu. Na o a tseba gore ke bafe?— Ke Mateo, Johane le Petro. Moapostola Mateo le moapostola Johane ba be ba tseba Jesu gabotse, gomme yo mongwe le yo mongwe wa bona o ngwadile puku ka bophelo bja Jesu. Moapostola Johane o ngwadile le puku yeo e bitšwago Kutollo gotee le mangwalo a mararo ao a bitšwago Johane wa Pele, Johane wa Bobedi le Johane wa Boraro. Moapostola Petro o ngwadile mangwalo a mabedi ao a lego ka Beibeleng. A bitšwa Petro wa Pele le Petro wa Bobedi. Ka lengwalong la gagwe la bobedi, Petro o ngwadile ka seo Jehofa a ilego a se bolela a le legodimong ka Jesu gore: ‘Yo ke morwa wa ka. Ke a mo rata e bile ke ikgantšha ka yena.’
Banna ba bangwe bao ba lego mo seswantšhong le bona ba re ruta ka Jesu dipukung tšeo ba di ngwadilego. Yo mongwe wa bona ke Mareka. Go ka direga gore o be a le gona ge Jesu a be a swarwa le go bona dilo ka moka tšeo di ilego tša direga. Yo mongwe gape ke Luka. Luka e be e le ngaka gomme go ka direga gore o ile a fetoga Mokriste ka morago ga ge Jesu a hwile.
Bangwadi ba bangwe ba babedi ba Beibele bao o ba bonago mo seswantšhong e be e le bana ba gabo Jesu ba banyenyane. Na o tseba maina a bona?— Ke Jakobo le Juda. Mathomong ba be ba sa dumele go Jesu. E bile ba be ba nagana gore o a gafa. Eupša ka morago ba ile ba dumela go Jesu gomme ya ba Bakriste.
Mongwadi wa Beibele wa mafelelo yo o mmonago mo seswantšhong ke Paulo. Pele ga ge e ka ba Mokriste, leina la gagwe e be e le Saulo. O be a hloile Bakriste e bile a ba tlaiša kudu. Na o a tseba gore ke eng seo se dirilego gore Paulo a nyake go ba Mokriste?— Ka letšatši le lengwe, Paulo o be a le tseleng gomme gateetee a kwa motho yo mongwe a bolela le yena go tšwa legodimong. Motho yoo a bego a bolela le yena e be e le Jesu! O ile a botšiša Paulo gore: ‘Ke ka baka la eng o tlaiša batho bao ba dumelago go nna?’ Ka morago ga moo, Paulo o ile a fetoga a ba Mokriste. Paulo o ngwadile dipuku tše 14 tša Beibele, go tloga ka Baroma go fihla ka Baheberu.
Na ga se therešo gore re bala Beibele letšatši le letšatši?— Ge re e bala, re ithuta dilo tše dintši ka Jesu. Na o ka rata go ithuta ditaba tše dingwe ka Jesu?—
