MUTU 11
Balembile Isya Yesu
Ngimba kuketa abanyambala aba pa chithuzithuzi?— Pali Matai, Marko, Luka, Yohani, Peteri, Yakobu, Yuda, na Pauli. Abanyambala aba balipo pakabalilo aka Yesu ali pa kisu. Balembile isya bumi bwa Yesu. Sa tumanyile isya banyambala aba.
Umanyilepo fiki isya bandu aba?
Abanyambala batatu bali batumiwa aba bafumusyagha pamopene na Yesu. Ngimba abanyambala batatu aba ubamenye?— Matai, Yohani, na Peteri. Matai na Yohani balim’menye kanunu Yesu, kangi bosa babili balembile isya Yesu. Untumiwa Yohani alembile ibuku lya Ubusetuli na bakalata batatu. Abakalata aba yo Yohani Wakwanda, Yohani Wabubili, na Yohani Wabutatu. Umfundiwa Peteri alembile abakalata babili aba bali mu Baibolo. Abakalata aba yo Peteri Wakwanda na Peteri Wabubili. Ukalata wabubili, Peteri alembile isi Yehova ayobile isya Yesu ufuma kumwanya, atile: ‘Uyu yo mwanangu, uyu nguhoboka nawe.’
Pa chithuzithuzi apa pali abanyambala abangi aba balembile isya Yesu. Yumo ali Marko. Abaghile ukuti alipo pakabalilo aka Yesu akoliwe, kangi aketile fyosa ifi fyabombiwagha. Uyungi ali yo Luka. Luka ali dokotala. Alyandile ukuya Mkristu bo Yesu afwile.
Abanyambala abangi aba kuketa pa chithuzithuzi banughuna ba Yesu. Ngimba ubamenye ingamu syabo?— Yo Yakobu na Yuda. Pabwandilo, bakali nulusubilo mwa Yesu. Abene binoghonagha ukuti untu wake ghonangike. Loli panyuma pake balwaghile ulusubilo mwa Yesu nukuya Bakristu.
Umundu wabumalilo pa banyambala aba bali pa chithuzithuzi apa yo Pauli. Yope alembile iBaibolo. Bo akali ukuya Mkristu, ingamu yake ali Sauli. Ababengile fiyo Abakristu kangi ababombelagha imbibi. Ngimba umenye ifi fyabombiwe ukuti Pauli aye Mkristu?— Isiku limo Pauli endagha munsebo, apilike umundu yumo akuyoba ukufuma kumwanya. Umundu uyu ali Yesu. Amulalusisye Pauli, ukuti: ‘Nongwa yafiki kubomba imbibi ku bandu aba bali nulusubilo kumyangu?’ Bo sibombiwe isi, Pauli asinthile ukuya Mkristu. Umwene alembile amabuku 14 gha mu Baibolo, ukwanda pa Baroma mpaka pa Bahiburi.
Tukubelenga iBaibolo isiku lililyosa, bwanaloli eti?— Linga tukubelenga iBaibolo, tumanyila fingi ifya Yesu. Ngimba kulonda umanya fingi ifya Yesu?—
