Уинис, хузӕбӕл ци лӕгтӕ ес, уони? ~ Етӕ ӕнцӕ Матфей, Марк, Лука, Иоанн, Петур, Иаков, Иудӕ ӕма Павел. Еци лӕгтӕ цардӕнцӕ Йесой рӕстӕги ӕма ин ӕ хабӕрттӕ ниффинстонцӕ. Гъӕйдӕ сӕбӕл фулдӕр базонӕн.

Ӕртӕ си ӕнцӕ, Йесой хӕццӕ ка игъосун кодта, еци апостолтӕ. Зонис ӕй, катӕ адтӕнцӕ? ~ Матфей, Иоанн ӕма Петур. Матфей ӕма Иоанн Йесой хъӕбӕр хуарз зудтонцӕ ӕма си алке дӕр Йесой туххӕй киунугӕ  ниффинста. Апостол Иоанн ма ниффинста Раргомади киунугӕ дӕр, удта ӕртӕ финстӕги: Иоанни фиццаг финстӕг, Иоанни дуккаг финстӕг ӕма Иоанни ӕртиккаг финстӕг. Апостол Петур дӕр ниффинста дууӕ финстӕги: Петури фиццаг финстӕг ӕма Петури дуккаг финстӕг. Ӕ дуккаг финстӕги Петур ниффинста, Йеговӕ Йесомӕ уӕлӕрвтӕй куд ӕрдзурдта, уой туххӕй: «Айӕ ӕй ма уарзон Фурт, мӕ зӕрди фӕндонмӕ гӕсгӕ Фурт».

Уонӕй уӕлдай ма хузӕбӕл ци лӕгтӕ ес, етӕ дӕр берӕ цидӕртӕ ниффинстонцӕ Йесой туххӕй. Сӕ еу адтӕй Марк. Йесой ку ниййахӕстонцӕ, уӕд Марк дӕр, ӕвӕдзи, уоми адтӕй, ӕма еугур хабӕрттӕ дӕр фӕууидта. Иннӕ ба адтӕй Лука. Лука адтӕй дохтир ӕма, ӕвӕдзи, киристон иссӕй Йесой мӕлӕти фӕсте.

Хузӕбӕл ма ци дууӕ ӕндӕр лӕги ес, етӕ ба адтӕнцӕ Йесой кӕстӕр ӕнсувӕртӕ. Зонис син сӕ нӕмттӕ? ~ Иаков ӕма Иудӕ. Киристебӕл тӕккӕ фиццаг етӕ нӕ баууӕндтӕнцӕ. Уотӕ сӕмӕ кастӕй, ӕма Йесо сӕрӕй фӕкуддӕр ӕй. Фал ибӕл уой фӕсте ба баууӕндтӕнцӕ ӕма етӕ дӕр иссӕнцӕ киристӕнттӕ.

Хузӕбӕл ма никкидӕр уинӕн Павели. Цалинмӕ киристон не ’ссӕй, уӕдмӕ ӕ ном хундтӕй Савл. Савл киристӕнтти хъӕбӕр нӕ уарзта ӕма сӕмӕ лӕгъуз цӕстӕй кастӕй. Зонис ӕй, киристон куд иссӕй, уой? ~ Еу бон Павел идард надбӕл ку цудӕй, уӕд фегъуста, уӕлӕрвтӕй имӕ кадӕр ке дзоруй. Е адтӕй Йесо! Йесо Павели бафарста: «Савл, мӕ фӕдбӕл цӕмӕн зелис?» Еци хабар Павелӕн ӕ цард хъӕбӕр феййивта, ӕма иссӕй киристон. Павел ниффинста Библий 14 киунуги – Ромӕгтӕмӕ финстӕгӕй райдайӕ ӕма Дзиуиттӕгтӕмӕ финстӕгӕй фӕууо.

Библи алли бон дӕр фӕккӕсис? ~ Библи ку фӕккӕсӕн, уӕд Йесой туххӕй берӕ цидӕртӕ базонӕн. Фӕндуй дӕ Йесой туххӕй фулдӕр базонун? ~