Dikhes ale muršen pro obrazkos? — On hine o Matuš, Marek, Lukaš, Jan, Peter, Jakub, Juda the o Pavol. On dživenas akor, sar o Ježiš dživelas a pisinenas pal leste. Genaha peske akana pal lende buter.

Trin lendar sas apoštola, save zvestinenas le Ježišoha. Džanes, sar pes vičinenas ala 3 apoštola? — Matuš, Jan the Peter. O apoštola o Matuš the o Jan prindžarenas mište le Ježiš a pisinde pal leskero dživipen e biblicko  kňižka. O apoštol Jan pisinďa thiš kňižka, so pes vičinel Zjaveňe the 3 ľila, so pes vičinen peršo, dujto the trito ľil le Janoskero. O apoštol Peter pisinďa 2 ľila, so hine andre Biblija, oda hin peršo the dujto Peteriskero. Andro dujto ľil o Peter pisinďa pal ada, sar o Jehovas vakerelas andal o ňebos a phenďa pal o Ježiš: „Oda hin miro čhavo. Me les igen rado dikhav a thovav andre leste baripen.“

The aver murša, so hine pro obrazkos, pisinenas kňižki, andre save sikavenas pal o Ježiš. Jekh lendar sas o Marek. Ov asi sas paš ada, sar le Ježiš thode andre bertena a dikhelas, so leha paľis kerenas. Dujto hino o Lukaš. Ov sas dochtoris a možno ačhiľa kresťanos, až sar o Ježiš muľa.

Duj murša, so dikhes pro obrazkos, sas le Ježišoskere terneder phrala, on thiš pisinde vareso andre Biblija. Džanes, sar pes on vičinenas? — On sas Jakub the Juda. Sar sas o Ježiš boldo čiže pokrsťimen a chudňa te kerel peskere učeňiken, ta leske na paťanas. Mišľinenas peske, hoj leske prechuťiľa. Ale paľis paťanďile a ačhile kresťana.

Posledno biblicko pisaťeľis, so dikhes pro obrazkos, hino o Pavol. Sigeder, sar sas kresťanos, pes vičinelas Saul. Ov ňenavidzinelas le kresťanen a sas ke lende igen nalačho. Džanes, sar ačhiľa o Pavol kresťanos? — Jekhvar, sar džalas o Pavol dromeha, ňisostar ňič šunďa hlasos andal o ňebos. Ada sas o Ježiš. Ov phenďa le Pavloske: „Soske sal ajso nalačho ko manuša, so mange paťan?” Paľis pes o Pavol zmeňinďa a ačhiľa kresťanos. O Pavol pisinďa 14 biblicka kňižki, le ľilestar le Rimanenge až ko ľil le Hebrejenge.

Genas peske e Biblija sako ďives? — Te peske genaha e Biblija, dodžanaha pes but pal o Ježiš. Kames te džanel buter pal o Ježiš? —