WEKELO 11
Vɔ wakafunde awui wendana la Yeso
Onde wɛ ekɔ lo mɛna apami wele l’osato ango?— Nkombo yawɔ ko Mateo, Makɔ, Luka, Joani, Petero, Jakɔba, Judɛ ndo Pɔɔlɔ. Apami anɛ tshɛ wakasɛnaka lo nshi ya Yeso, ndo wakafunde akambo wendana la nde. Ɛsɔ tɔsɛdingole akambo amɔtshi wendana la wɔ.
Kakɔna keyayɛ lo dikambo di’apami anɛ?
Asato wa l’atei awɔ waki apɔstɔlɔ wakasambisha kaamɛ la Yeso. Onde wɛ mbeyaka nkombo y’apami asato asɔ?— Nkombo yawɔ ko Mateo, Joani la Petero. Ɔpɔstɔlɔ Mateo ndo Joani wakeyaka Yeso dimɛna, ndo onto l’onto akafunde dibuku diendana la lɔsɛnɔ la Yeso. Ɔpɔstɔlɔ Joani akafunde nto dibuku dia Ɛnyɛlɔ, Joani ya ntondo, ya hende ndo ya sato. Ɔpɔstɔlɔ Petero akafunde abuku ahende wa lo Bible. Abuku akɔ ko Petero ka ntondo ndo ka hende. Lo mukanda ande wa hende, Petero akafunde lo kɛnɛ kendana l’etena kakatɛkɛta Jehowa lo dikambo dia Yeso oma l’olongo ate: ‘Ɔnɛ ekɔ ɔnami. Dimi mbolangaka ndo lekɔ l’ofunu lo dikambo diande.’
Apami akina wɛnayɛ l’osato ango tetshaka akambo wendana la Yeso lo abuku wakawafunde. Ɔmɔtshi la l’atei awɔ ko Makɔ. Ondo nde aki lawɔ etena kakawande Yeso ndo akɛnyi kiambokambo tshɛ yakatombe. Okina la l’atei awɔ ko Luka. Nde aki dɔkɔtɛlɛ ndo ondo akayokoma Okristo l’ɔkɔngɔ wa nyɔi ka Yeso.
Afundji ahende akina wɛnayɛ l’osato ɔnɛ waki anango Yeso. Onde wɛ mbeyaka nkombo yawɔ?— Nkombo yawɔ ko Jakɔba nde la Judɛ. Ntondotondo, vɔ komonga la mbetawɔ le Yeso. Vɔ wakakome polo lo mbuta ɔnɛ nde ambodjɔ dadi. Koko l’ɔkɔngɔ diko, vɔ wakayongaka la mbetawɔ le Yeso ndo wakayokoma Akristo.
Ofundji w’ekomelo wɛnayɛ l’osato ɔnɛ ko Pɔɔlɔ. La ntondo ka nde ndjokoma Okristo, wakawelɛka Saolo. Nde akahetshaka Akristo ndo akaahɛnyahɛnyaka efula. Ko onde wɛ mbeyaka woho wakayokomaka Pɔɔlɔ Okristo?— Lushi lɔmɔtshi, etena kakatandaka Pɔɔlɔ lɔkɛndɔ, mbala kakɔ ɔtɔi nde akoke dui di’onto ɔmɔtshi oma l’olongo. Onto akɔ ko Yeso. Nde akambola Pɔɔlɔ ate: ‘Lande na kahɛnyahɛnyayɛ wanɛ wele la mbetawɔ le mi?’ L’ɔkɔngɔ wa laasɔ, Pɔɔlɔ akasale etshikitanu ndo akakome Okristo. Nde akayofunda abuku 14 wa lo Bible, mbuta ate ntatɛ lo Rɔmɔ polo lo Hɛbɛru.
Sho mbadiaka Bible lushi tshɛ, shi ngasɔ?— Wadielo wa Bible ambotokimanyiya dia mbeya awui efula wendana la Yeso. Onde wɛ nangaka mbeya awui efula wendana la Yeso?—
