Nakikita mo ba an mga lalaki ha retrato?— Hira hi Mateo, Marcos, Lucas, Juan, Pedro, Santiago, Judas, ngan Pablo. Hira ngatanan nabuhi han nakanhi hi Jesus ha tuna, ngan nagsurat hira mahitungod kan Jesus. Pag-istoryahan naton hira.

An tulo ha ira mga apostol nga nagsangyaw kaupod ni Jesus. Maaram ka ba kon hin-o hira?— Hira Mateo, Juan, ngan Pedro. Kilala gud han mga apostol nga hira Mateo ngan Juan hi Jesus, ngan an kada tagsa ha ira nagsurat hin libro mahitungod han kinabuhi ni Jesus. Hi apostol Juan nagsurat liwat  hin libro nga gintatawag nga Pahayag ngan hin tulo nga surat nga gintatawag nga Siyahan nga Juan, Ikaduha nga Juan, ngan Ikatulo nga Juan. Hi apostol Pedro nagsurat hin duha nga surat nga aada ha Biblia. Gintatawag ito nga Siyahan nga Pedro ngan Ikaduha nga Pedro. Ha iya ikaduha nga surat, igin-istorya niya an mahitungod han pagyakan ni Jehova tikang ha langit ngan nagsiring mahitungod kan Jesus: ‘Ini an akon anak. Akon hiya hinigugma ngan nalilipayan.’

An iba nga lalaki ha retrato nagtututdo liwat ha aton mahitungod kan Jesus ha mga libro nga ira iginsurat. Usa ha ira hi Marcos. Posible nga nakadto hiya han gindakop hi Jesus ngan nakita an ngatanan nga nahitabo. Usa pa ha ira hi Lucas. Doktor hiya ngan posible nga nagin Kristiano katapos mamatay hi Jesus.

An duha pa nga nagsurat han Biblia nga makikita mo ha retrato amo an manghod nga kabugtoan ni Jesus. Maaram ka ba han ira ngaran?— Santiago ngan Judas. Ha tinikangan, waray hira tumoo kan Jesus. Naghunahuna pa ngani hira nga lurong hiya. Pero ha urhi, tinoo hira ngan nagin Kristiano.

An ultimo nga nagsurat han Biblia nga makikita mo ha retrato amo hi Pablo. Saul an iya ngaran han diri pa hiya Kristiano. Nasisina gud hiya hadto ha mga Kristiano ngan ginkukontra niya hira. Maaram ka ba kon kay ano nga naruyag hi Pablo nga magin Kristiano?— Usa ka adlaw, tikadto hi Pablo ha Damasco han tigda nga may nakiistorya ha iya tikang ha langit. Hiya hi Jesus! Ginpakianhan niya hi Pablo: ‘Kay ano nga ginkukontra mo an mga natoo ha akon?’ Katapos hito, nagbag-o hi Pablo ngan nagin Kristiano. Nagsurat hiya hin 14 nga libro han Biblia, tikang ha libro han Roma tubtob ha Hebreo.

Di’ ba ginbabasa naton an Biblia kada adlaw?— Pinaagi ha pagbasa han Biblia, damu an aton nahibabaroan mahitungod kan Jesus. Karuyag mo ba nga mas mahibaro pa mahitungod kan Jesus?—