¿A wojel wa máax le máakoʼob ku chíikpajloʼob teʼ dibujooʼ?... U kʼaabaʼobeʼ Mateo, Marcos, Lucas, Juan, Pedro, Santiago, Judas yéetel Pablo. Le máakoʼobaʼ kuxlajoʼob tu kʼiiniloʼob Jesús, yéetel tsʼíibnajoʼob tu yoʼolal. Le baʼaxoʼob tu tsʼíibtoʼoboʼ tiaʼanoʼob teʼ Bibliaoʼ. Koʼox maas kaanbal tiʼ letiʼob.

Óoxtúul tiʼ letiʼobeʼ apostoloʼob yéetel tu láakʼintoʼob Jesús teʼ kʼaʼaytajoʼ. ¿A wojel wa máaxoʼobiʼ?... Mateo, Juan yéetel Pedro. Le apóstol Mateo yéetel Juanoʼ jach tu kʼaj  óoltoʼob Jesús, yéetel cada juntúuleʼ tu tsʼíibtoʼob junpʼéel libro ku tʼaan tiʼ u kuxtaloʼ. Le apóstol Juanoʼ tu tsʼíibtaj xan junpʼéel libro ku kʼaabaʼtik Apocalipsis yéetel óoxpʼéel cartaʼob tu kʼaabaʼtoʼob U Yáax Tsʼíib Juan, U Kaʼapʼéel Tsʼíib Juan yéetel U Yóoxpʼéel Tsʼíib Juan. Le apóstol Pedrooʼ tu tsʼíibtaj kaʼapʼéel cartaʼob yaan ichil le Bibliaoʼ, lelaʼ tu kʼaabaʼtoʼob, U Yáax Tsʼíib Pedro yéetel U Kaʼapʼéel Tsʼíib Pedro. Teʼ tu kaʼapʼéel cartaoʼ, Pedroeʼ tʼaanaj tiʼ le ka uʼuyaʼab u tʼaan Jéeoba desde teʼ kaʼan ka tu yaʼalaj tu yoʼolal Jesús: «Lelaʼ in hijo. Jach in yaabiltmaj, yéetel jach ku kiʼimakkúuntik in wóol».

Le uláakʼ máakoʼob ku chíikpajloʼob teʼ dibujooʼ láayliʼ tʼaanajoʼob tiʼ Jesús ichil le libroʼob tu tsʼíibtoʼoboʼ. Juntúul tiʼ letiʼobeʼ Marcos. Maʼ xaaneʼ letiʼeʼ tiaʼan le ka maʼach bisbil Jesusoʼ yéetel tu yilaj tuláakal le baʼax úuchoʼ. Uláakʼ juntúuleʼ Lucas. Letiʼ kaʼacheʼ doctor, yéetel maʼ xaaneʼ tsʼokaʼaniliʼ u kíimil Jesús ka káaj u beetik le baʼaxoʼob tu kaʼansaj Jesusoʼ.

Kaʼatúul tiʼ le uláakʼ máaxoʼob tsʼíibt le Biblia ku chíikpajloʼob xan teʼ dibujooʼ, u yíitsʼinoʼob Jesús. ¿A wojel wa bix u kʼaabaʼob?... U kʼaabaʼobeʼ Santiago yéetel Judas. Tu káajbaleʼ maʼ tu creertoʼob le baʼax tu kaʼansaj Jesusoʼ. Ku tuklikoʼobeʼ maʼ jach tu yóol yaniʼ. Baʼaleʼ ka tsʼoʼokeʼ tu creertoʼob yéetel tu beetoʼob baʼax tu kaʼansaj.

U tsʼook tiʼ le máaxoʼob tsʼíibt le Biblia ku chíikpajloʼob teʼ dibujooʼ, Pablo. Táanil tiʼ u beetkuba apostoleʼ, Saulo u kʼaabaʼ kaʼachi. Letiʼeʼ jach u pʼekmaj kaʼach u disipuloʼob Jesús yéetel kʼasaʼan tu yéeteloʼob. ¿A wojel wa bix úuchik u káajal u beetik baʼax tu kaʼansaj Jesús?... Junpʼéel kʼiineʼ, le táan u viajaroʼ tu yuʼubaj u tʼaʼanal desde teʼ kaʼanoʼ. ¿Máax tʼanik kaʼach? ¡Jesús le máax tʼanoʼ! Letiʼeʼ tu yaʼalaj tiʼ Pablo: «¿Baʼaxten jach kʼasaʼanech yéetel máaxoʼob beetik baʼax tin kaʼansoʼ?». Desde leloʼ Pabloeʼ kʼexpaji ka káaj u beetik baʼax tu kaʼansaj Jesús. Pabloeʼ tu tsʼíibtaj 14 tiʼ le libroʼob yaan teʼ Bibliaoʼ, desde Romailoʼob tak Hebreoʼob.

Toʼoneʼ k-ilik xokik sáamsamal le Bibliaoʼ, ¿máasaʼ?... Ken k-xok le Bibliaoʼ k-kanik yaʼab baʼaloʼob tu yoʼolal Jesús. ¿Máasaʼ jach a kʼáat a kan u maasil tu yoʼolal letiʼ?...