SINDING 12
Paul Tupa Hangsan
A pu-no nuntakna a hon khia naupangkhat thu sin ni maw. Ama pu-no pen sawltak Paul hi. A min bel i thei kei a, ahi zongin hangsan taka a na sepna khat i thei hi. Hangsan taka a sepna thu na ngai nuam uh naa?—
Jerusalem ah Paul thongkia hi. Jesuh’ thu gen kawikawi ahih manin kiman hi. Migilo pawlkhat in Paul mudah uh a, thusia khat gel uh hi. Amau ‘Paul pen thu kikhen dingin galkap te’n hong pai pih nading galkap mangpa kiang ngen in, en’ lampi ah kibu in, Paul hong pai ciang i that lum ding hi’ ci-in a kikum sim uh hi!
Paul’ tupa in Paul leh galkap mangpa kiang thusia kigelna gen
Tua thusim pen Paul tupa in na za hi. Tu’n ama’n banghih cih na thei hiam? Thong ah va pai-in Paul kiang tua thu na gen hi. Paul in tua thusia agel uh galkap mangpa tung va gen in ci-in a sawl pah hi. Galkap mangpa kiang Paul tupa in thu gen ngam in na um hiam?—Haksa ding hi. Ba’hang hiam cih leh galkap mangpa cih pen aana nei mahmah hi. Ahihzong in Paul’ tupa pen hangsan ahih teh, va gen hi.
Galkap mangpa in bangci sep ding cih thei hi. Ama’n galkap mi 500 phial tawh Paul cingsak hi. Tua nitak mah in Sisaria khua-ah Paul a pai pih nading un thu a pia hi. Lampi ah Paul a suakta hiam?—Suakta mah, migilo te’n bawlsia zo lo! Migilo-te gelna kipelh ta hi.
Hih tangthu pan bang hong theisak ahia le?—Nang zong Paul’ tupa mah bangin hangsan thei hi teh. Adiakdiak in midang-te kiang Jehovah thu i gen ciang hangsan ding kisam hi. Hangsan takin Jehovah thu na gen ngam uhdiam?—Tua bangin na gen ngam uh leh, midangte nuntakna a honkhia na suak ding hi.
