Takuentajüin paala pümüin nüchiki wanee jimaʼai akaaliinjakai nülaüla. Nia nüsiipü chi aluwataaushikai Pablo. Nnojotsü atüjaanüin saaʼu kasaichin nünülia. Shia watüjaaka aaʼu yalayalain naaʼin. ¿Pütüjawee aaʼu kasain naainjüin?...

Chajachi Pablo püreesain chaa Jerusalén. ¿Jamüshiche püreesaka nia? Shia saaliijee nüküjüin pütchi nüchiki Jesuu. Eejanaka müin waneeinnua wayuu oʼuteekana naaʼin Pablo makalaka yootojiraain naya nikiira. Nachuntüin nüntinnüinjachin Pablo suluʼumüin tü kanüliakat Sanedrín shiiʼiree noukajüin nüpüla wopuluʼu. Shiasaʼa müin nülatüinjachipa Pablo, ashutüinjana naaʼu.

Naapa achikirü tia wanee nüsiipü Pablo. ¿Kasache naainjaka naapapa tia? Oʼunüshi nia eejachire Pablo süpüla nüküjüinjatüin süchiki. Naapapa Pablo süchiki tü aainjünajatkat nüka, nuluwataain chi nüsiipükai eemüin chi sülaülakai surulaat süpüla nüküjüinjatüin shia. ¿Mapüleesatche nümüin nüsiipü Pablo yootuin nia nümaa chi sülaülakai surulaat?... Aa, kapüleesü nümüin. Süka jamüin, chi sülaülakai surulaat nia wanee wayuu kojutüshi maʼin atumawaa. Nnojoipejeʼe mmoluin chi nüsiipükai Pablo, naashajaa amaachi chi sülaülakai surulaat.

Naapapa chi sülaülakai surulaat süchiki tü aainjünüinjatkat nüka Pablo, nuluwataain maʼaka 500 surulaat sünain aaʼinmajaa Pablo. Niʼikajeʼerüin Pablo soʼuleʼeya aikat tia chamüin Cesarea. ¿Ashutüshiiche naaʼu Pablo na wayuu oʼuteekana naaʼin?... Nnojo, nnojoliishii ashutüin naaʼu. Nnojotsü naainjüin na wayuukana tü naashajaakat achiki paala nikiira Pablo.

¿Kasa shikirajaka anain pia nukuwaʼipa nüsiipü Pablo?... Yalayalainjatü paaʼin maʼaka naaʼin chi nüsiipükai Pablo. Nnojolinjachi pia mmoluin sünain aashajawaa namaa na wayuukana nüchiki Jeʼwaa. ¿Jama piakai? ¿Meimmoluinjeechi pia sünain aküjaa pütchi nüchiki Jeʼwaa?... Meimmoluinre pia sünain aküjaa pütchi, eejeerü süpüla katüin soʼu tü wayuu aapajakat pünüiki.