Ammuenta ti agtutubo a lalaki a nangisalakan iti angkelna. Ni apostol Pablo ti angkel dayta nga agtutubo. Ditay ammo ti naganna. Ngem ammotayo nga adda inaramidna a pakakitaan ti kinaturedna. Kayatmo kadi a maammuan?—

Natiliw ni Pablo ken naibalud idiay Jerusalem gapu ta nangasaba maipapan ken Jesus. Adda dagiti dakes a lallaki a manggurgura ken Pablo, isu a kayatda a patayen. Kinunada: ‘Ibagatayo iti komander dagiti soldado nga ipanda ni Pablo iti korte. Kalpasanna, aglemmengtayo iti dalan a pagnaanda ket inton lumabasda, patayentayo ni Pablo!’

Nangngeg ti kaanakan ni Pablo dayta a plano. Ammom kadi ti inaramidna? Napan iti nakaibaludan ni Pablo ket imbagana dayta. Dagus a binilin ni Pablo nga ibagana dayta iti komander ti soldado. Nalaka ngata para iti kaanakan ni Pablo ti makisao iti komander?— Saan, gapu ta ti komander ket nangato nga opisial. Ngem natured ti kaanakan ni Pablo isu a nakisao iti opisial.

Ammo ti komander no ania ti aramidenna. Nangibaon iti dandani 500 a soldado a mangsalaknib ken Pablo! Iti dayta met la a rabii, binilinna dagiti soldado nga ipanda ni Pablo idiay Cesarea. Naispal kadi ni Pablo?— Wen, saan a natuloy ti dakes a plano dagiti lallaki a mangpatay ken Pablo.

Ania ti maadalmo iti daytoy nga estoria?— Matuladmo met ti kinatured ti kaanakan ni Pablo. Masapul a naturedtayo no ibagatayo ti maipapan ken Jehova. Agbalinka kadi met a natured ken agtultuloy nga agsao maipapan ken Jehova?— No aramidem dayta, maisalakanmo ti biag ti dadduma.