Ta reke twĩrute ũhoro wa mũndũ mũnyinyi ũrĩa wahonokirie mamawe. Mamawe aarĩ mũtũmwo Paulo. Tũtiũĩ rĩĩtwa rĩa mũndũ ũcio mũnyinyi, no nĩ tũũĩ atĩ nĩ eekire ũndũ woonanirie ũcamba. No wende kũigua ũrĩa eekire?—

Paulo ohetwo njera taũni-inĩ ya Jerusalemu, nĩ ũndũ wa kũhunjia ũhoro wa Jesu. Andũ amwe oru nĩ maathũire Paulo, na kwoguo makĩbanga ũndũ mũru. Makĩĩrana ũũ: ‘Nĩ twĩre mũnene wa thigari atũme thigari ciake irehe Paulo igoti-inĩ. Tũcoke twĩhithe barabara-inĩ, Paulo akĩhĩtũkio-rĩ, tũmũũrage!’

Mũndũ ũcio mũnyinyi wetaga Paulo mama akĩigua ũhoro wa mũbango ũcio. Angĩekire atĩa? Aathiire njera na akĩra Paulo ũhoro ũcio. O rĩo, Paulo akĩmwĩra athiĩ ere mũnene wa thigari ũhoro wa mũbango ũcio mũũru. Nĩ ũgwĩciria ta warĩ ũndũ mũhũthũ harĩ mũndũ ũcio mũnyinyi kwarĩria mũnene wa thigari?—Ndwarĩ ũndũ mũhũthũ tondũ mũnene ũcio wa thigari aarĩ mũndũ wetigĩrĩtwo mũno. No tondũ mũndũ ũcio mũnyinyi aarĩ na ũcamba, akĩarĩria mũnene ũcio wa thigari.

Mũnene ũcio wa thigari nĩ aamenyire ũrĩa egwĩka. Eethire thigari hakuhĩ magana matano igitĩre Paulo. Agĩciatha itware Paulo kũndũ gwetagwo Kaisarea ũtukũ o ro ũcio. Hihi Paulo nĩ aahonokirio?— Nĩ aahonokirio tondũ andũ acio oru matingĩahotire kũmũtharĩkĩra! Kwoguo mũbango wao mũũru ũkĩaga gũkinyanĩra.

Ũngĩĩruta ũndũ ũrĩkũ kuumana na rũgano rũrũ?— O nawe no ũgĩe na ũcamba o ta mũndũ ũcio mũnyinyi. Nĩ twagĩrĩirũo gũkorũo na ũcamba rĩrĩa tũraria na andũ arĩa angĩ ũhoro wa Jehova. Hihi wee nĩ ũkũgĩa na ũcamba na ũthiĩ na mbere kwaria ũhoro wa Jehova?— Weka ũguo, no ũhonokie mũndũ.