A pu nunna chhanhimtu râwlthar pakhat chanchin i lo zir teh ang. A pu chu tirhkoh Paula a ni a. Ama hming erawh kan hre lo va, mahse, thiltih huaisenthlâk tak a ti tih chu kan hria a ni. Chu a thiltih chu i hre duh em?—

Paula chu Jerusalem tân inah khung a ni a. Isua chanchin mite hnêna a hrilh vâng a ni. Mi sual ṭhenkhat chuan Paula chu an hua a, ruahmanna sual tak an siam a. Heti hian an sawi a ni: ‘Sipai hotu chu a sipaite vênhimna hnuaiah rorêlna ina Paula rawn hruai tûrin i ngên ang u. Tichuan, kawng sîrah kan lo biru ang a, Paula a lo thlen veleh kan that dâwn nia!’ tiin.

Paula unaunu fapa chuan an thiltum chu a lo hria a. Eng nge a tih ang? Tân inah kalin, Paula hnênah chuan a thu hriat chu a va hrilh a ni. Paula chuan chu ruahmanna sual tak chu sipai hotu hnêna hrilh nghâl tûrin a lo ti a. Paula unaunu fapa tân sipai hotu biak chu a awlsam i ring em?— Sipai hotu hi mi pawimawh tak a nih avângin, chu chu thil awlsam a ni lo. Mahse, ani chu a huaisen a, sipai hotu chu a be ta a ni.

Sipai hotu chuan a tih tûr tak chu a hria. Sipai 500 vêl lai chu Paula vênghim tûrin a tîr ta! Chu mi zânah chuan Paula chu Kaisari khuaa hruai tûrin a hrilh a ni. Paula nunna chu chhan chhuah a ni em?— Ni e, chûng mi sualte chuan an bei thei ta si lo va! An ruahmanna sual tak chu a hlawhtling ta lo a ni.

He mi chanchin aṭang hian eng nge i zir theih?— Nang ngei pawh Paula unaunu fapa ang khân i huaisen thei a. Mite hnêna Jehova chanchin kan hrilh hunah kan huaisen a ngai a ni. Huaisen takin Jehova chanchin i sawi reng ang em?— Chutianga i tih chuan tuemaw nunna chu i chhan chhuak thei dâwn a ni.