Hankooni nihuserye vooloca sa mmiravo yoola aakhapelenle okumi wa taata awe. Taata a mmiravo ola ti murummwa Paulo. Hiyaano hannasuwela nsina na mmiravo yoola, nnya ninnasuwela wi owo oheera echu moolipa murima. Onnachuna owiriyana vooloca sa yeeyo enreiye?—

Paulo aari mukariposo o Yerusalemu. Owo aawaleliwa vanthowa na olaleerya vooloca sa Yesu. Alopwana oonanara yaanamwiica Paulo, awo yaapaka yoolakelela yoonanara. Awo yaaloca: ‘Hankooni naloce ni mutokweene anakhoco wi anakhoco awe emuruuhe Paulo onipuro na othoriha. Hiyaano nnahaala wiipitha mu ephiro, nave Paulo oviraka, nnanwerya omwiipha!’

Musulwa a Paulo aahiiwa vooloca sa yoolakelela eyo. Tiheeni owo aahaaleiye weera? Owo aaya o kariposo wi amuleele Paulo vooloca sa yeela. Aapwaha, nnya Paulo aahimuleela musulwa awe wi aye aloce ni mutokweene a kariposo vooloca sa yoolakelela eyo yoonanara. We onuupuwela wi waari wookhweya wa musulwa a Paulo oloca ni mutokweene a kariposo?— Hooye, ntakhara mutokweene a kariposo ari mulopwana ochuneyaxa. Nnya musulwa a Paulo ari oolipa murima nto aaloca ni mutokweene a kariposo.

Mutokweene a kariposo aasuwela aahaaleiye weera. Owo aahaarehererya anakhoco ancipale awaakhwana masana mathanu wi emukhapelele Paulo! Owo aahaaleela anakhoco, wi emukuxe Paulo emukerihe o Kaisareya mu ohiyu yoole. Okumi wa Paulo waavuluxiwa?— Aayi, alopwana onanara awo hiyawenrye omphara Paulo! Yoolakelela aya yoonanara hiyeeren’ye.

Tiheeni onaweryaawe ohuserya orweela wa yaweereya yeela?— We tho onanwerya okhala oolipa murima ntoko musulwa a Paulo. Ti woochuneya hiyaano okhala oolipa murima vaavaa nnalocaahu ni akina vooloca sa Yehova. We onahaala olipa murima ni otitelela oloca sa Yehova?— Weerano, we onahaala ovuluxa ikumi sa achu.