Ka twegye ebirikukwata aha mutsigazi owaacungwire nyinarumi. Nyinarumi w’omutsigazi ogu akaba ari Paulo. Omutsigazi ogu titurikumanya eiziina rye, kwonka nitumanya ngu haine eki yaakozire ekyayorekire ngu akaba ari emanzi. Nooyenda kumanya eki yaakozire?—

Paulo akaba ari Yerusaalemu omu kihome. Akaba akomirwe ahabw’okubuurira ebirikukwata ahari Yesu. Hariho abashaija babi abaabaire nibanga Paulo, kandi bakacwa obwengye kumwita. Bakagira bati: ‘Ka tushabe mukuru w’amahe ayohereze abaserukare be bareete Paulo omu icwero ry’emanja. Nitwija kweshereka aha rubaju rw’enguuto, reero Paulo ku araabe naarabaho, tumwite.’

Mwihwa wa Paulo akahurira nibacwa obwengye kwita Paulo. Mbwenu shi akaba aine kukora ki? Akaza omu kihome yaagambira Paulo. Ahonaaho Paulo akagambira mwihwa we kugambira mukuru w’amahe ngu nibaza kwita Paulo. Noogira ngu kikaba kyorobi mwihwa wa Paulo kugambira mukuru w’amahe?— Ngaaha, ahakuba mukuru w’amahe akaba ari omushaija w’ekitiinisa. Kwonka mwihwa wa Paulo akaba ari emanzi kandi akabaasa kugambira mukuru w’amahe ogwo.

Mukuru w’amahe akamanya eki aine kukora. Akoohereza abaserukare nka 500 kurinda Paulo. Ekiro ekyo, akabagambira kutwara Paulo Kaisarea. Mbwenu shi bakarinda Paulo?— Eego buzima, abashaija babi abo tibaarabaasize kumwita.

Ekitebyo eki waakyegaho ki?— Naiwe noobaasa kuba emanzi nka mwihwa wa Paulo. Twine kugira obumanzi twaba nitugambira abandi ebirikukwata ahari Yehova. Noija kuba emanzi ogume noogambira abandi ebirikukwata ahari Yehova?— Waakora otyo, noobaasa kuhwera abandi kutunga amagara agatahwaho.