Mee waaʼee dargaggeessa lubbuu eessumasaa oolche tokkoo haa barannu. Eessumni dargaggeessa kanaa Phaawulosidha. Maqaa dargaggeessa kanaa hin beeknu; garuu wanta ija jabina guddaa gaafatu akka godhe beekna. Dargaggeessi kun maal akka godhe beekuu barbaaddaa?—

Phaawulos Yerusaalemitti hidhamee ture. Waaʼee Yesus waan lallabeef hidhame. Namoonni hamoon tokko tokko Phaawulosiin waan jibbaniif akkas jedhanii waan hamaa mariʼatan: ‘Ajajaan loltootaa, loltoonnisaa Phaawulosiin gara mana murtiitti akka fidan akka godhu isa haa gaafannu. Achiis karaarra dhokannee yeroo Phaawulos darbu isa ajjeesna.’

Ilmi obboleettii Phaawulos wanta isaan mariʼatan dhagaʼe. Maal godheree? Gara mana hidhaa dhaqee wanta kana Phaawulositti hime. Phaawulos yeruma sana, mucichi gara ajajaa loltootaa dhaqee waaʼee akeeka namoota kanaa akka isatti himu isa erge. Ilma obboleettii Phaawulosiif wanta kana ajajaa sanatti himuun salphaa waan ture sitti fakkaataa?— Ajajaan sun bakka guddaa waan qabuuf kana gochuun salphaa hin turre. Mucichi garuu ija jabeessa waan taʼeef ajajaa sanatti himeera.

Ajajaan sun maal gochuu akka qabu beeka ture. Loltoonni 500 taʼan Phaawulosiin akka eeganiifi halkan sana gara Qiisaariyaatti akka isa geessan ajaje. Phaawulos utuu homaa hin taʼin achi gaʼee?— Eeyyee, namoonni hamoon sun isa miidhuu hin dandeenye! Akeeknisaanii inni gadheen hin milkoofne.

Seenaa kanarraa maal baratta?— Atis akkuma ilma obboleettii Phaawulos ija jabeessa taʼuu dandeessa. Waaʼee Yihowaa warra kaanitti ennaa himnu ija jabeeyyii taʼuu nu barbaachisa. Ija jabinaan waaʼee Yihowaa dubbachuukee itti fuftaa?— Yoo akkas goote, lubbuu namootaa oolchuu dandeessa.