Lección 12
Mana manchaj huambrami tiyarca
Shuj huambramanta parlashun. Paica apóstol Pablota ama huañuchichunmi ayudarca. Ima shuti cashcataca mana yachanchijchu. Pablopaj sobrinomi carca. Paica mana manchajmi carca. ¿Pablopaj sobrino imata rurashcata yachasha ninguichu?...
Jesusmanta gentecunaman huillacushcamantami Pablotaca Jerusalenpi prezu churarcacuna. Shujtajcunaca Pablota pꞌiñashcamantami llaquichisha nishpa parlanacurcacuna. Soldadocunata mandajmanca: “Pablotaca cambaj soldadocunahuan mandajcunapajman cachai” ninamanmi risha nircacuna. Paicunaca ñanpi pacalla chapashpami Pablota huañuchishun nircacuna.
Pablopaj sobrinoca Pabloman huillashca qꞌuipami soldadocunata mandajman huillarca
Pablota huañuchisha nicujtami paipaj sobrinoca yachaj chayarca. ¿Paica imatataj rurarca? Pablomanmi huillanaman rirca. Pabloca: “Soldadocunata mandajman tucuita utca huillagri” nircami. Achca soldadocunata mandajhuan parlanaca mana jahuallachu carca. ¿Pablopaj sobrinoca parlanaman rircachu?... Ari, mana manchashpami tucuita huillarca.
Pablopaj sobrinotaca soldadocunata mandajca allimi uyarca. Pablota ama huañuchichun nishpami casi 500 soldadocunahuan Cesarea llajtaman cacharca. “Cai tutallataj pushaichij” nircami. ¿Millai cꞌaricunaca Pablota huañuchircachu?... ¡Mana huañuchircachu! Chai cꞌaricunaca imatapish mana rurai tucurcachu.
¿Pablopaj sobrinomanta yachanata munarcanguichu?... Paica mana manchaj huambrami carca. ¡Canpish Pablopaj sobrino shinami mana manchaj huambra cai tucungui! Jehovamanta gentecunaman huillanataca mana manchanachu canchij. ¿Mana manchashpa Jehovamanta huillashpa catisha ninguichu?... Jehovamanta huillashpami catina canchij. Chashnami achca gentecuna quishpirichun ayudashun.
