Ase sifundze ngelijaha lelasindzisa kuphila kwamalume walo. Malume walelijaha bekungumphostoli Pawula. Asilati libito lalelijaha, kodvwa siyati kutsi lenta intfo leyakhombisa kutsi belinesibindzi. Ungatsandza yini kuva kutsi lentani?—

Pawula bekasejele eJerusalema. Bekaboshelwe kutsi bekashumayela ngaJesu. Lamanye emadvodza labenetinhlitiyo letimbi abemtondza Pawula, ngako amentela licebo lelibi. Atsi: ‘Asicele umphatsi welibutfo atjele emasotja akhe kutsi aletse Pawula lapha enkantolo. Tsine sitawubhaca emgwacweni, futsi utawutsi nakendlula Pawula, simbulale.’

Umshana waPawula weva ngalelicebo. Abetawenta njani? Wahamba waya ejele wafike watjela Pawula ngalelicebo. Ngaso leso sikhatsi, Pawula watjela lomshana wakhe kutsi akahambe ayewuchazela umphatsi welibutfo lemasotja ngalelicebo lelibi. Ucabanga kutsi bekumelula yini ngalomshana waPawula kutsi akhulume nalomphatsi?— Cha, bekungasimelula ngobe lomphatsi abeyindvodza lehlonishwako. Kodvwa lomshana waPawula waba nesibindzi futsi wakhuluma nalomphatsi.

Lomphatsi bekati kutsi yini lokufanele ayente. Wabita libutfo lemasotja lacishe abe ngu-500 kutsi livikele Pawula. Watjela lelibutfo kutsi lihambe naPawula kulobo busuku limyise eKhesariya. Wasindza yini Pawula?— Yebo, ngobe lamadvodza labenetinhlitiyo letimbi awazange akwati kumhlasela. Licebo lawo lelibi aliphumelelanga.

Yini longayifundza kulendzaba?— Nawe ungaba nesibindzi njengemshana waPawula. Kudzingeka sibe nesibindzi nasikhuluma nalabanye ngaJehova. Utawuba naso yini sibindzi futsi uchubeke ukhuluma ngaJehova?— Nangabe utawenta njalo, ungase usindzise kuphila kwalomunye umuntfu.