Mai ita aprende kona-ba mane joven ida neʼebé salva ninia tiu nia moris. Mane joven neʼe nia tiu mak apóstolu Paulo. Maski ita la hatene joven neʼe nia naran, maibé ita hatene duni katak nia halo buat neʼebé brani tebes. Ó hakarak hatene kona-ba saida mak nia halo?—

Paulo iha komarka laran iha sidade Jeruzalein. Ema kaer nia tanba nia haklaken kona-ba Jesus. Maibé mane balu odi Paulo, tan neʼe sira halo planu aat ba nia. Sira hatete: ‘Mai ita husu komandante ba tropa atu haruka ninia soldadu sira atu lori Paulo ba tribunál. No ita sei subar iha dalan hodi hein nia. Kuandu Paulo liu, ita sei oho nia!’

Paulo nia sobriñu rona kona-ba planu aat neʼe. Nuneʼe, nia halo saida? Nia bá komarka no fó-hatene Paulo kona-ba ida-neʼe. Iha tempu neʼe kedas, Paulo dehan ba nia atu fó-hatene tropa nia komandante kona-ba planu aat neʼe. Tuir ó-nia hanoin, fasil ka lae ba Paulo nia sobriñu atu koʼalia ba komandante neʼe?— Lae, tanbasá? Tanba komandante neʼe mak ema importante ida. Maibé Paulo nia sobriñu mak aten-brani no nia koʼalia ba komandante neʼe.

Komandante neʼe hatene saida mak nia tenke halo. Nia halibur ninia soldadu maizumenus naʼin-500 atu proteje Paulo. Nia hatete ba sira atu lori Paulo ba sidade Sezareia kalan neʼe kedas. Paulo hetan perigu iha dalan ka lae?— Lae, mane aat sira-neʼe la bele ataka nia. Sira-nia planu aat neʼe lakon, no Paulo la mate.

Saida mak ó bele aprende husi istória neʼe?— Ó mós bele hatudu aten-brani hanesan Paulo nia sobriñu. Ita presiza brani kuandu ita koʼalia ba ema seluk kona-ba Jeová. Ó sei hatudu brani no koʼalia nafatin kona-ba Jeová ka lae?— Se ó halo hanesan neʼe, ó bele salva ema seluk nia moris.