Atwiiye kujatikizya musankwa wakafwutula buumi bwabaaisyanyina. Baaisyanyina musankwa ooyu wakali mwaapostolo Paulo. Tatumuzyi zina musankwa ooyu, pele ncotuzyi ncakuti wakacita cintu cimwi cabusicamba. Sena inga wayanda kuzyiba ncaakacita?—

Paulo wakali muntolongo ku Jerusalemu. Wakalaangidwe akaambo kakuti wakali kukambauka kujatikizya Jesu. Bantu babyaabi tiibakali kumuyanda Paulo, aboobo bakajisi makanze mabyaabi. Eelyo bakati: ‘Atwaambile mupati wabasikalumamba kuti amulete Paulo kunkuta. Tulamuyubilila Paulo munzila, mpoonya ainda buyo tulamujaya!

Mujwa wa Paulo wakaamvwa makani aaya. Ino wakacita buti? Wakaunka kuntolongo akuyoomwaambila Paulo. Cakutasowa ciindi, Paulo wakamwaambila kuti aambile mupati wabasikalumamba kujatikizya makanze aaya mabyaabi. Sena uyeeya kuti cakali cuuba-uba kumujwa wa Paulo kubandika amupati wabasikalumamba?— Peepe, akaambo kakuti mupati wabasikalumamba wakali muntu uulemekwa. Pele mujwa wa Paulo wakali sicamba, aboobo wakamwaambila mupati wabasikalumamba.

Mupati wabasikalumamba wakalizyi cini ncaakali kuyandika kucita. Wakabweza basikalumamba batandila ku 500 kutegwa bamukwabilile Paulo! Wakabaambila kuti bamutole Paulo ku Kaisareya masiku ngaonya aayo. Sena Paulo wakafwutulwa?— Inzya, bantu aaba babyaabi bakaalilwa kumujaya! Makanze aabo mabyaabi tanaakazwidilila.

Ncinzi ncokonzya kwiiya mumakani aaya?— Anduwe ulakonzya kuba sicamba mbuli mujwa wa Paulo. Tweelede kuba basicamba notwaambila bantu kujatikizya Jehova. Sena uyooba sicamba akuzumanana kubandika kujatikizya Jehova?— Kuti wacita oobo, ulakonzya kufwutula bamwi.