LEKSYON 12
Waray Gud Mahadlok an Umangkon ni Pablo
Aton pag-istoryahan an mahitungod ha usa nga batan-on nga lalaki nga nagtalwas han kinabuhi han iya uncle. Hi apostol Pablo an uncle hito nga batan-on. Diri kita maaram han iya ngaran, pero maaram kita nga may ginbuhat hiya nga waray gud hiya mahadlok. Karuyag mo ba mahibaroan kon ano an iya ginbuhat?—
Priso hi Pablo ha Jerusalem. Gindakop hiya kay nagsinangyaw hiya mahitungod kan Jesus. May salbahis nga mga tawo nga nasisina kan Pablo, salit nagplano hira hin maraot. Nagsiring hira: ‘Hangyoon ta an kumander nga magsugo ha iya mga sundalo nga dad-on hi Pablo ha korte. Magtatago kita ha ligid han kalsada, ngan kon umagi hi Pablo, patayon naton hiya!’
An umangkon ni Pablo nagsumat ha iya ngan ha kumander han mga sundalo mahitungod han maraot nga plano
Nabatian han umangkon ni Pablo ito nga plano. Ano an iya ginhimo? Kumadto hiya ha prisohan ngan ginsumatan hito hi Pablo. Ginsugo dayon hiya ni Pablo nga sumatan an kumander mahitungod hiton maraot nga plano. Ha imo hunahuna, masayon la ba para ha umangkon ni Pablo nga makiistorya ha kumander?— Diri, kay hitaas an ranggo hito nga tawo. Pero waray mahadlok an umangkon ni Pablo, ngan nakiistorya hiya ha kumander.
Maaram gud an kumander kon ano an iya bubuhaton. Nagpatawag hiya hin 500 nga sundalo basi protektaran hi Pablo! Ginsugo niya hira nga dad-on hi Pablo ha Cesarea hito nga gab-i. Natalwas ba hi Pablo?— Oo, waray nahimo nga maraot kan Pablo iton salbahis nga mga tawo! Waray matuman an ira plano.
Ano an imo mahibabaroan tikang hini nga istorya?— Pariho han umangkon ni Pablo, puydi ka liwat magpakita hin kawaray kahadlok. Kinahanglan diri kita mahadlok kon nakikiistorya ha iba mahitungod kan Jehova. Diri ka ba mahahadlok nga ig-istorya pirme ha iba an mahitungod kan Jehova?— Kon oo, puydi mo matalwas an kinabuhi han iba.
