XOOKIL 12
U sobrino Pabloeʼ maʼ sajakchajiʼ
Koʼox kaanbal tiʼ juntúul xiʼipal tu salvartaj u kuxtal u tío. U tío le xiʼipalaʼ letiʼe apóstol Pablooʼ. Maʼ k-ojel bix u kʼaabaʼ le xiʼipalaʼ, baʼaleʼ letiʼeʼ maʼ sajakchajiʼ. ¿A kʼáat wa a wojéelt baʼax tu beetaj?...
Pabloeʼ kʼalaʼan kaʼach cárcel tu kaajil Jerusalén. Kʼaʼali tumen tʼaanaj tiʼ Jesús. Jujuntúul máakoʼob kʼasaʼanoʼobeʼ jach u pʼekmoʼob Pablo, le oʼolal tu tukloʼob u kíimskoʼob. Letiʼobeʼ tu yaʼaloʼob: «Koʼoneʼex aʼalik tiʼ u comandanteil le soldadoʼob ka u beet u taasaʼal Pablo teʼ tuʼux yanoʼonaʼ, toʼon túuneʼ yaan k-taʼakikba tu jáal le bejoʼ. Ken máansaʼak túun Pabloeʼ k-kíimsik».
U sobrino Pabloeʼ tu yaʼalaj tiʼ letiʼ yéetel tiʼ le comandante le baʼax taak u beetik le kʼasaʼan máakoʼoboʼ
Baʼaleʼ u sobrino Pabloeʼ tu yuʼubaj le baʼax taak u beetik le kʼasaʼan máakoʼoboʼ. ¿Baʼax tu beetaj? Bin u yil u tío teʼ tuʼux kʼalaʼanoʼ ka tu yaʼalajtiʼ le baʼax taak u beetaʼaltiʼoʼ. Pablo túuneʼ tu yaʼalajtiʼ ka xiʼik u yaʼal tiʼ u comandanteil le soldadoʼoboʼ. ¿Chéen chʼaʼabil wa le baʼax tu beetaj u sobrino Pablooʼ?... Maʼatech, tumen le máakaʼ jach yaan autoridad tiʼ. Baʼaleʼ le xiʼipalaʼ maʼ tu chʼaʼaj saajkiliʼ ka bin tʼaan tu yéetel.
Le comandante túunoʼ tu túuxtaj 500 soldadoʼob kanáantik Pablo tak Cesarea teʼ áakʼab jeʼeloʼ. ¿Béeychaj wa ta tʼaan u salvartaʼal Pablo tiʼ le kʼasaʼan máakoʼoboʼ?... Jaaj, béeychaji; le kʼasaʼan máakoʼoboʼ maʼ jóokʼoʼob yéetel baʼax ku tuklikoʼobiʼ.
¿Baʼax ka kanik tiʼ le tsikbalaʼ?... Jeʼex u sobrino Pabloeʼ, techeʼ jeʼel u páajtal a weʼesik maʼ ta chʼaʼik saajkileʼ. Ken tʼaanakoʼon tiʼ Jéeoba yéetel uláakʼ máakoʼobeʼ maʼ unaj k-chʼaʼik saajkiliʼ. Techeʼ, ¿yaan wa a weʼesik maʼ saajkech tʼaan tiʼ Jéeobaiʼ?... Wa ka beetkeʼ jeʼel xan a salvartik u kuxtal uláakʼ máakoʼobeʼ.
