Nyo iromo ninyutho nia wabeweco iwi Ker makani?— Eyo, tie Ker pa Mungu, Ker ma biketho ng’om zoo udok ni paradiso. Nyo imaru ing’ei lembe moko iwi Ker maeno?—

Ker ceke tie ku Rwoth. Rwoth ke bebimo wi dhanu mi ng’om pare. Ing’eyo nia Rwoth mi Ker pa Mungu tie ng’a?— Tie Yesu Kristu. Ebedo i polo. Ceng’ni eni ebidoko Rwoth iwi dhanu ceke mi wi ng’om! Iparu nia wabibedo kud anyong’a kinde ma Yesu bidoko Rwoth iwi ng’om zoo?—

Wabibedo kud anyong’a lee akeca! I Paradiso, dhanu bidhau kendo ngo man lwiny de gibikiedo kendo ngo. Dhanu ceke bimariri i kindgi. Ng’atu moko mbe ma biremo kadi ma bitho. Abinga bineno, udhing’ biwinjo, man dhanu ceke ma giwotho ngo pilembe gitie abala gibiwotho, gibiringo ng’wec man gibipor malu. Dhanu ceke bibedo ku cam lee. Yedi ma tung’ tung’ bikwo ku winjiri maber i kindgi man kudwa. Ju m’utho bicer. Dhanu ma tung’ tung’ ma co ku ma mon ma waponjo pigi i nyathibuku  maeni calu Rebeka, Rahab, Daudi, man Eliya gibicer bende! Nyo imaru inen kugi saa ma gibicer i ie?—

Yehova meri man emito nia ibed kud anyong’a. Kan imediri niponjo lembe iwi Yehova man niwore, ibikwo rondo ku rondo i ng’om maleng’, niwacu i Paradiso! Nyo imaru ikwo i Paradiso?—