SƆ̃ƆSIRU 14
Ban te ta koo tem gira kpuro kpara
Kaa kpĩ a tubu ban te sa ka yã?— Geema, Gusunɔn banda, ban tera ta koo tem gɔsia alusanna. A kĩ a yɛ̃ru sosi ban te sɔɔ?—
Bandu baatere ta ra n ten sunɔ mɔwa, kpa sunɔ wi, u tɔmbu kpara win tem bɔnu sɔɔ. A yɛ̃ warà sãa Gusunɔn ban ten sunɔ?— Yesu Kirisiwa. U wãa wɔllɔ. Saa fiiko sɔɔ, u koo ko tɔmbu kpuron sunɔ tem sɔɔ! Wunɛn waaru sɔɔ, sa ko sa n nuku dobu mɔ saa ye Yesu u koo ko sunɔ tem gira kpuro sɔɔ?—
Mba ya nun nɛni a ko alusanna sɔɔ?
Sa ko sa n nuku dobu mɔ too! Alusanna sɔɔ, goo kun maa sannamɔ ǹ kun mɛ u tabu da. Tɔmba koo n kĩanɛ. Goo kun maa baramɔ ǹ kun mɛ u gbi. Wɔ̃ko koo yam wa, soso koo gari nɔ, baa yɛmɔbun tii ba koo kpĩ bu duka kpa ba n yɔ̃ɔkumɔ. Dĩana kon yiba. Kpa yɛɛ yi n wãa sannu bɔri yɛndu sɔɔ, kpa tɔnu u yɛɛ baayere susi bɛrum sariru sɔɔ. Tɔn be ba gu, ba koo wurama wãaru sɔɔ. Tɔn dabi nin gari a mɛɛra tire teni sɔɔ, nge Rebeka, Rahabu, Dafidi ǹ kun mɛ Eli, ben tii ba koo wurama wãaru sɔɔ! A kĩ a be wa a ka be gari ko sanam mɛ ba koo wurama?—
Ma a bɔ a yɛ̃ru sosimɔ Yehofa sɔɔ, ma a Wi mɛm nɔɔwammɛ, kaa kpĩ a n wãa alusanna bura ye sɔɔ sere ka baadommaɔ! Yera a du kĩ?—
Yehofa nun kĩ ma u kĩ a n nuku dobu mɔ.