Yala i b’a dɔn an bɛ ka kuma masaya min kan wa?— Ɔwɔ, Ala ka Masaya de ko don, o masaya de bɛna dugukolo kɛ alijinɛ ye. Yala e b’a fɛ ka fɛn caman dɔn o masaya kan wa?—

Masaya bɛɛ ni a masakɛ don. Wa masakɛ bɛ mara kɛ a ka jamana kɔnɔ mɔgɔw de kunna. Yala e b’a dɔn jɔni ye Ala ka Masaya masakɛ ye wa?— Yesu Krisita don. A bɛ ka ɲɛnamaya kɛ sankolo la. Sɔɔni, a bɛna kɛ masakɛ ye dugukolo mɔgɔw bɛɛ kunna! Yala e ka miiri la an bɛna kɛ nisɔndiya la ni Yesu ye Masakɛ ye dugukolo bɛɛ kunna wa?—

An bɛna kɛ nisɔndiyaba la! Alijinɛ kɔnɔ, mɔgɔw tɛna kɛlɛ kɛ walima ka taa kɛlɛ la bilen. Mɔgɔw bɛɛ bɛna ɲɔgɔn kanu. Maa si tɛna bana walima ka sa. Fiyɛntɔw bɛna yeli kɛ, tulogerenw bɛna mɛnni kɛ, ani minnu tɛ se ka taama olu bɛna se ka boli ani ka panpan. Dumuni bɛna mɔgɔw bɛɛ labɔ. Baganw bɛna kɛ teriw ye u yɛrɛ dama ni ɲɔgɔn cɛ ani u bɛna kɛ an teriw ye. Mɔgɔ minnu sara olu bɛna segin ɲɛnamaya la. Cɛ ni muso caman, i bɔra ka minnu dɔn nin gafenin sababu la i n’a fo Rebɛka, Rahab, Dawuda ani Eli, bɛna segin ɲɛnamaya la  fana! Yala a ka di i ye ka olu ye ni u seginna ɲɛnamaya la wa?—

Jehova bɛ i kanu ani a b’a fɛ i ka kɛ nisɔndiya la. Ni i taara a fɛ k’a ɲini ka Jehova dɔn ani ka a kan minɛ, i bɛna se ka ɲɛnamaya kɛ badaa alijinɛ cɛɲumanba kɔnɔ! Yala o de ka di i ye wa?—