Eski ou konnen ki Rwayonm nou pe koz lo la?— Wi, Rwayonm Bondye. Se sa Rwayonm ki pou fer later antye vin en paradi. Eski ou ti a kontan konn plis lo sa Rwayonm?—

Tou Rwayonm i annan en lerwa. Sa lerwa i diriz bann dimoun dan son pei. Eski ou konnen lekel sa Lerwa dan Rwayonm Bondye?— Zezi Kri. I reste dan lesyel. Byento i pou vin Lerwa tou dimoun lo later! Eski nou pou kontan ler Zezi pou Lerwa later antye?—

Nou pou vreman kontan! Dan Paradi, dimoun pa pou lager, ni al lager. Tou dimoun pou kontan kanmarad. Personn pa pou malad ouswa mor. Bann ki pa vwar kler pou kapab vwar kler, bann ki sourd pou tande e sa bann ki pa kapab marse pou taye e sotaye. Tou dimoun pou annan ase manze. Bann zannimo pou vin zanmi avek kanmarad e avek nou. Bann dimoun ki’n mor pou resisite. En kantite zonm ek madanm ki nou’n koz lo la dan sa pti liv parey Rebeka,  Raab, David ek Eliya pou resisite. Eski ou ti a kontan zwenn zot ler zot resisite?—

Zeova i kontan ou e i anvi ki ou lavi i gou. Si ou kontinyen aprann konn Zeova e obeir li, ou pou kapab viv pour touzour dan en zoli paradi! Eski se sa ki ou anvi?—