O kila na Matanitu cava qori?— Io, na Matanitu ni Kalou, qori na Matanitu ena vakalesuya mai vuravura na parataisi. O via kila eso tale na ka me baleta na Matanitu qo?—

Na matanitu kece e tiko na kena iliuliu. Era na vakarorogo ena nona lewa o ira kece na vakarurugi ena nona matanitu. O kila se o cei na Tui ni Matanitu ni Kalou?— O Jisu Karisito, e tiko mai lomalagi. Sa vakarau noda Tui kece na lewe i vuravura! Vakacava eda na marau ni sa lewa na vuravura na Tui o Jisu?—

Io, eda na marau vakalevu! Ena sega na veivala se na ivalu ena Parataisi. Era na veilomani kece o ira na bula kina. Ena sega na tauvimate kei na mate. O ira na mataboko era na rai, rogo na didivara, era na cici qai lade o ira na sega ni lako rawa. Ena levu na kakana. Era na veiyaloni na manumanu, era na veiyaloni tale ga kei keda. O ira na mate era na vakaturi. Era na vakaturi tale ga e levu na tagane kei na yalewa eda veivosakitaka ena ivola qo me vakataki Repeka, Reapi, Tevita, kei Ilaija! Vakacava o na  via sotavi ira ena gauna era vakaturi kina?—

E lomani iko o Jiova, e vinakata tale ga mo marau. Ke o vulica tiko ga na veika me baleti Jiova qai vakarorogo vua, o na bula tawamudu ena dua na parataisi totoka! O vinakata qori?—