A ka tuùn Axɔ́suɖuto e xó ɖɔ wɛ mǐ ɖè é à?— Axɔ́suɖuto Mawu tɔn wɛ. Axɔ́suɖuto enɛ wɛ na bló bɔ ayikúngban ɔ na huzu Palaɖisi. A ka jló na lɛ́ kplɔ́n nǔ dó Axɔ́suɖuto enɛ wu d’eji à?—

Axɔ́suɖuto bǐ wɛ nɔ ɖó axɔ́su ɖé. Bɔ axɔ́su ɔ nɔ kpa acɛ dó mɛ e ɖò tò tɔn mɛ lɛ é jí. A ka tuùn mɛ e nyí Axɔ́su nú Axɔ́suɖuto Mawu tɔn é à?— Jezu Klisu wɛ. É nɔ nɔ jixwé. Zaanɖé dìn ɔ, é na ɖu axɔ́su dó mɛ bǐ jí ɖò ayikúngban jí! A ka lin ɖɔ mǐ na nɔ awǎjijɛ mɛ, hwenu e Jezu na ɖu axɔ́su dó ayikúngban ɔ bǐ jí é à?—

Mǐ na ɖó awǎjijɛ ɖesu! Ðò Palaɖisi mɛ ɔ, mɛɖé sɔ́ na xò hun alǒ fun ahwan ɖě ǎ. Mɛ lɛ bǐ na nɔ yí wǎn nú yeɖée. Mɛ ɖě sɔ́ na jɛ azɔn alǒ kú ǎ. Nukúntíntɔ́nnɔ lɛ na mɔ nǔ, tókúnɔ lɛ na sè nǔ, mɛ e ma sixu ɖi zɔnlin ǎ lɛ é na kpéwú bo kánwezun bo na lɔ́n. Mɛ bǐ na ɖó nǔɖuɖu gegě. Kanlin lɛ sɔ́ na nɔ xò daka yeɖée wu ɖě ǎ, bɔ fífá na nɔ mǐ kpo ye kpo tɛntin. Mɛ e ko kú lɛ é na fɔ́n wá gbɛ̀. Sunnu kpo nyɔnu kpo e wu mǐ kplɔ́n nǔ dó ɖò alɔnuwema elɔ mɛ lɛ é lɔ na fɔ́n wá gbɛ̀, ɖi Hlebeka, Hlaxabu, Davidi kpo Elíi  kpo. A ka jló na mɔ ye hwenu e ye na fɔ́n é à?—

Jehovah yí wǎn nú we bo jló ɖɔ a ni ɖó awǎjijɛ. Enyi a kpò ɖò nǔ kplɔ́n dó Jehovah wu wɛ bo nɔ setónú n’i ɔ, a na nɔ Palaɖisi ɖɛkpɛɖɛkpɛ e ja é mɛ kaka sɔyi! Nǔ e ba wɛ a ɖè é nɛ à cé?—