Ko kona ni keetinna bwa te Tautaeka raa ae ti na maroroakinna?— Eng, bon Ana Tautaeka n Uea te Atua ae te Tautaeka ae e na karika te aonnaba bwa te bwaretaiti. Ko kan reiakina riki taekan te Tautaeka n Uea aei?—

Iai ueea n tautaeka nako, ao e tautaeka te uea i aoia kaain abana. Ko ataia bwa antai te Uea n Ana Tautaeka n Uea te Atua?— Bon Iesu Kristo. E maeka i karawa. E a kaan te tai are e nang Uea iai i aoia kaain te aonnaba ni kabane! N am iango, ti na kukurei ngkana e a Uea Iesu i aon te aonnaba ni kabutaa?—

Ti na bon rangi ni kukurei! A nang aki manga un aomata ke ni buaka n te Bwaretaiti. A nangi bane aomata n itangitangiri i marenaia. Ai akea ae e na aoraki ke ni mate. A nangi noraaba mataki, a nang ongo bonotaninga ao a nang kona n nakonako ke ni biribiri te koraki ake a aki kona n nakonako. E nang bati kanaia aomata nako. A nang iraorao maan i marenaia ao a na iraorao naba ma ngaira. A nang kautaki aomata ake a mate. A nang kautaki naba mwaane ma aine aika bati ake ko a tia n reiakin taekaia n te boroutia aei n aron Rebeka, Nei Raaba, Tawita ao Eria! Ko kani  kaitiboo ma ngaiia ngkana a kautaki?—

E tangiriko Iehova ao e tangiriko naba bwa ko na kukurei. Ngkana ko teimatoa n reiakina taekan Iehova ao n ongeaba irouna, ko na kona iai ni maiu n aki toki n te bwaretaiti ae tikauarerei! Anne ae ko tangiria?—