É kọ olo é láá nyimá ló é Bon Méné ee gé kọ́ nu ea kil lóí?— Ẽei, níà Bon Méné Bàrì. Nakà Bon Ménéí nía é tú boo kunùkẽ̀ í naamá Páladaìs e. É kọ àẹ́ léémá ni ge kpaá nó nu ea kil ló nakà Bon Ménéí bọ̀ọ̀vẹ̀?—

Kọ̀láá kà bon méné ólò ié enè kà méné. Ménéí ólò bẹ̀l boo gbò e bà di mm̀ ńlẹ́ẹ̀ dó. É kọ olo nyímà gé ló nen ea dú méné mm̀ Bon Méné Bàrì í?— Níà Jíízọ̀s Kráìst. Ẹlẹ tõó gbàn deè káála. Gbálà ń kem̀ tṍó ẹlẹ é gé dú méné boo kọ̀láá nen ea di boo kunùkẽ̀í! É kọ olo bùlà kọ èé tõo gé mm̀ ẹ́ẹ́ ẹẹ̀ nyíe tṍó e Jíízọ̀s é dú méné boo kunù kẽ̀í?—

Èé palàge di mm̀ ẹ́ẹ́ ẹẹ̀ nyíe! Gbò nen náa é béná bé kàna àbéé ge bébé gím tọ̀ọ̀ tóm mm̀ Páladaìs, kọ̀láá nen é vulè ene nè ene. Lóó tọ́ọ̀ nen náa é zọ à bèè ge ù. Gbò gímádẽe gé mon nu, gbò káátṍ gé dã́ nu, vaá gbò e bà náa géè laá kyã̀à téélági vaá pẹgi. Kọ̀láá nen gé íe gbèle tõ̀ò nu ge dè. Gbò nom gé bãà kóò ene nè ene vaa bãà nàgé kóò beele gbò nen. Gbò e bà beè ù gé kẽèã̀ vaá tõó dùm. Tõ̀ò gbò gbálà nè gbò bia eo beè nó nu ea kilvá ló mm̀ ńkem̀ kpo kpáí e sìgà ọ̀và kọlà  Rìbékà, Réhab, Dévid, nè Èláíjà gé kẽèã̀ nagé aa boo gé kpaá tõó dùm! É kọ àe léémá ni ge mòn gbòí tṍó e bà é kẽèã̀?—

Jìhóvà vulè olo vaá gbĩ́ kọ ó tõó mm̀ ẹ́ẹ́ ẹẹ̀ nyíe. Be olo kilsĩ́ gè nó nu ea kil ló Jìhóvà, vaá o gbàn nee tṍ ló, olo é tõó dùm dọ̀ọ̀mà dèdè mm̀ kàlé Páladaìs! É kọ níà nu ea bii gé olo é?—