¿A léʼ ka exlaʼ jitaʼ játs an éyal axi neʼets kin abatnaʼ an Tsabál?... Pél in Eyaltal a Dios. Neʼets kin wenkʼow an Tsabál lej alabél ani neʼets ki ejtow ku kʼwajiy tanáʼ. ¿A léʼ ka exlaʼ más tin kwéntaj axéʼ xi Éyal?...

¿A exlál jantʼoj játs jún i tsʼále? Pél jún i atikláb axi abatnom. In Éyaltal a Dios jaye in kwaʼal jún i tsʼále. ¿A exlál jitaʼ játs?... ¡Pél a Jesús! Jajáʼ u kʼwajíl ti éb, ani weʼits neʼets kin abatnaʼ patal an atiklábchik. ¿Walám a Jesús neʼets kin tʼajaʼ ti alwaʼ abatnom? Tam jajáʼ kin abatnaʼ an Tsabál ¿neʼets ku kʼwajiy kulbél?...

¡Antsanáʼ! Tam an Tsabál ka kʼwajiy alabél, yabáts neʼets ka waʼtsin i pejextaláb. Tam, ¡an atiklábchik yabáts neʼets ka pejéxin kʼal ni jantʼoj! Ni jitaʼ yabáts neʼets ka yawʼláts ani ka tsemets. An atiklábchik axi jokʼtsij neʼets ka tsúʼuxin, ani axi yab otsʼox neʼets ka otsʼoxin. Axi yab in ejtowal ti belal neʼets ka beláts ani ka ádhláts. Patal neʼets kin koʼoy yán i kʼapnél. An koʼnélchik yabáts neʼets ti péjéx ani wawáʼ neʼets ki ejtow ku ubátʼin kʼal jajáʼchik. Ani waʼats jantʼoj más: an tsemélomchik neʼets ka kʼwajiy junílekʼij. Nixéʼ in léʼ kin uluw abal a Rebeca, a Rahab,  a David, a Elías ani kʼeʼatchik i atikláb neʼets ka kʼwajiy junílekʼij. ¿Yab aníts abal a léʼ ka exlaʼchik?...

A Jehová ti lej kʼanidhál ani in léʼ abal kit kʼwajiy kulbél. Ka exóbnaʼ tin kwéntaj jajáʼ ani ka belkaʼ jawaʼ ti exóbchij. Max ka tʼajaʼ, neʼets ka ejtow kit kʼwajiy abal etsʼey ti an alabél tsabál. ¿A léʼ kit kʼwajiy tanáʼ?...