Գիտե՞ս ո՛ր Թագաւորութեան մասին կը խօսինք։— Աստուծո՛յ Թագաւորութեան մասին։ Երբ այս Թագաւորութիւնը գայ, երկիրը դրախտ պիտի ըլլայ։ Կ’ուզե՞ս այս Թագաւորութեան մասին աւելի սորվիլ։—

Ամէն թագաւորութիւն թագաւոր մը ունի։ Եւ թագաւորը իր ժողովուրդին վրայ կ’իշխէ։ Գիտե՞ս Աստուծոյ Թագաւորութեան Թագաւորը ո՛վ է։— Յիսուս Քրիստո՛ս։ Հիմա ան երկինքի մէջ Թագաւոր է։ Մօտ ատենէն, հոս երկրի վրա՛յ ալ Թագաւոր պիտի ըլլայ ամէն մարդու վրայ։ Ի՞նչ կ’ըսես. երբ Յիսուս ամբողջ երկրի վրայ Թագաւոր ըլլայ, մենք ուրախ պիտի ըլլա՞նք։—

Այո, շա՜տ ուրախ պիտի ըլլանք։ Դրախտին մէջ, մարդիկ իրարու հետ պիտի չկռուին։ Ամէն մարդ իրար պիտի սիրէ։ Մէկը պիտի չհիւանդանայ եւ չմեռնի։ Կոյրը որ չի տեսներ՝ պիտի տեսնէ, խուլը որ չի լսեր՝ պիտի լսէ, եւ ան որ չի կրնար քալել՝ պիտի կրնայ վազել ու ցատկել։ Ամէն մարդ լեցուն ուտելիք պիտի ունենայ։ Կենդանիները իրարու հետ պիտի խաղան, մենք ալ իրենց հետ պիտի խաղանք։ Անոնք որ մեռած են, յարութիւն պիտի առնեն, այսինքն ե՛տ պիտի ապրին։ Այս գիրքին մէջ կարգ մը մարդոց եւ կիներու մասին սորվեցար։ Անոնցմէ շատեր երկրի վրայ ե՛տ պիտի ապրին, ինչպէս՝ Ռեբեկան, Ռախաբը,  Դաւիթը եւ Եղիան։ Կ’ուզե՞ս իրենց տեսնել երբ յարութիւն առնեն։—

Եհովան քեզ կը սիրէ եւ կ’ուզէ որ ուրախ ըլլաս։ Եթէ միշտ Եհովային մասին սորվիս եւ միշտ իրեն հնազանդիս, գեղեցիկ դրախտի մը մէջ յաւիտեա՛ն պիտի ապրիս։ Կ’ուզե՞ս Դրախտին մէջ ապրիլ։—