Mo tjiwa kutja Ouhona uṋe mbu matu hungirire ko mbwi?— Ii, Ouhona waMukuru, owo mbu mau katjita kutja ouye auhe u rire oparadisa. Ove mo vanga okutjiwa ovingi ohunga nOuhona mbwi?—

Ouhona auhe u kara nombara. Nu ombara i honaparera po ovandu vehi rayo. Ove mo tjiwa kutja Ombara yOuhona waMukuru ouṋe?— OJesus Kristus. Eye u kara meyuru. Moruveze rwatjimanga eye ma honapara otjOmbara kombanda yovandu avehe mbe ri kombanda yehi! Mo munu kutja indu Jesus tja rire Ombara youye auhe, matu kara nondjoroka po?—

Eṱe tjiri matu kara nondjoroka onene! Moparadisa ovandu kave nokukarwa poo okuyenda kovita rukwao. Ovandu avehe mave suverasana. Kape nomundu ngu ma vere poo okukoka. Ovapoṱu mave munu, ozomboro maze zuu nu imba mbe ha kayenda mave utu okutupuka nokutuka peyuru. Ovandu avehe mave kara novikurya ovingi okurya. Nu maku kakara ohange pokati kovandu novipuka. Ovandu mba ṱa mave kapendurwa. Ovarumendu novakazendu ovengi mbu we rihonga mokambo nga tjimuna Rebeka, Rahab, David na Elia mave kapendurwa wina! Ove mo vanga okukahakaena  kuna wo indu tji mave kapendurwa po?—

Jehova we ku suvera nu u vanga kutja u kare nondjoroka. Tji wa kayenda komurungu okurihonga ohunga na Jehova nokara nonḓuviro ku ye, mo yenene okuhupa nga aruhe moparadisa ombwa! Indji oonḓero yoye po?—