Ammum kari nu anni nga Pappatulan yatun?— Wan, Pappatulan na Dios. Pabbalinanna tu paraiso i interu davvun. Ikayamu kari nga magigiammu i aru paga meyannung taw nga Pappatulan?—

Egga patul na kada pappatulan. Mammaguray yayya ta ngamin nga totolay ta lugarna. Ammum kari nu sinni i Patul na Pappatulan na Dios?— Si Jesu-Cristo. Egga yayya ta langi. Aranni ngana yayya nga mammaguray ta ngamin nga egga ta davvun! Magayayyatam pano sonu mammaguray ngana si Jesus ta interu davvun?—

Magayayya ittam! Ta Paraiso, ari ngana maddarama onu maggegerra i totolay. Ayatan na totolay i kataggitadday. Awan ngana tu mattaki onu matay. Makasingan noka i vuling, makaginna i bangngag, anna makkarela anna mallattu-lattu danuri ari makalakag. Aru noka i makang para ta ngamin. Mabbaling tu masippo i aya-ayam ira anna mabbaling tu kofudda i totolay. Maginnolay noka i natay ira. Aru nga lallaki anna babbay nga nammammum taw nga brosiur i maginnolay gapa noka kagitta da Rebeka, Rahab, David, anna Elias! Ikayamu  kari ira masingan sonu mapaginnolay ira?—

Iddukannaka ni Jehova anna ikayana nga mabbalikka tu masaya. Nu kanayukka nga maggigiammu meyannung kani Jehova anna mattuppal sa, mattolay ka noka tu mannanayun ta makakkasta nga paraiso! Ikayamu kari yatun?—