Nĩ ũĩ nĩ Ũthamaki ũrĩkũ ũcio?— Nĩ Ũthamaki wa Ngai, Ũthamaki ũrĩa ũgaatũma thĩ yothe ĩtuĩke paradiso. No wende kwĩruta ũhoro makĩria wĩgiĩ Ũthamaki ũcio?—

Gũtirĩ ũthamaki ũtakoragwo na mũthamaki. Na mũthamaki nĩwe wathaga andũ a bũrũri wake. Nĩ ũĩ Mũthamaki wa Ũthamaki wa Ngai nũũ?— Nĩ Jesu Kristo. Jesu aikaraga igũrũ. Na kahinda gatarĩ haraihu nĩ egũtuĩka mũthamaki wa andũ othe thĩinĩ wa thĩ! Nĩ ũgwĩciria ta tũgaakena rĩrĩa Jesu agatuĩka Mũthamaki wa thĩ yothe?—

Nĩ tũgaakena mũno! Thĩinĩ wa Paradiso, andũ matigacoka kũhĩtania kana kũrũa. Andũ othe magaakorũo mendanĩte. Gũtirĩ mũndũ ũkaarwaraga kana agakua. Andũ arĩa matonaga nĩ makoona, arĩa mataiguaga nĩ makaigua, nao arĩa matahotaga gũthiĩ nĩ makaahota gũteng’era na kũrũgarũga. Andũ othe nĩ magaakorũo na irio nyingĩ cia kũrĩa. Nyamũ igaikaranagia na thayũ, na nginya ithuĩ tũgaikaranagia nacio na thayũ. Andũ arĩa makuĩte nĩ makaariũkio. Athuri na atumia aingĩ arĩa wĩrutĩte ũhoro wao ibuku-inĩ rĩrĩ ta Rebeka, Rahabu,  Daudi, na Elija, o nao nĩ makaariũkio! No wende gũkaamona rĩrĩa makaariũkio?—

Jehova nĩ akwendete na nĩ endaga ũkorũo na gĩkeno. Wathiĩ na mbere kwĩruta ũhoro wa Jehova na kũmwathĩkĩra, nĩ ũgatũũra tene na tene thĩinĩ wa paradiso thaka! Hihi ũguo nĩguo ũngĩenda?—