មេរៀនទី១៤
រាជាណាចក្រមួយដែលនឹងគ្រប់គ្រងផែនដីទាំងមូល
តើយើងចង់និយាយអំពីរាជាណាចក្រមួយណា? តើកូនអាចស្មានបានទេ?— ពិតមែនហើយ គឺរាជាណាចក្ររបស់ព្រះដែលនឹងធ្វើឲ្យផែនដីទៅជាសួនឧទ្យាន។ តើកូនចង់រៀនថែមទៀតអំពីរាជាណាចក្រនេះទេ?—
រាជាណាចក្រទាំងឡាយមានស្ដេចជាអ្នកគ្រប់គ្រង។ ធម្មតា ស្ដេចគ្រប់គ្រងលើមនុស្សដែលនៅក្នុងប្រទេសរបស់គាត់។ ដូច្នេះ តើអ្នកណាជាស្ដេចនៃរាជាណាចក្ររបស់ព្រះ? តើកូនដឹងទេ?— គឺលោកយេស៊ូគ្រិស្ដ។ លោករស់នៅស្ថានសួគ៌ ហើយមិនយូរទៀត លោកនឹងធ្វើជាស្ដេចលើមនុស្សទាំងអស់នៅផែនដី! ពេលលោកយេស៊ូគ្រប់គ្រងជាស្ដេចនៅផែនដីទាំងមូល តើកូនគិតថាយើងនឹងសប្បាយឬទេ?—
ក្នុងសួនឧទ្យាន តើកូនទន្ទឹងចាំអ្វី?
យើងនឹងសប្បាយរីករាយខ្លាំងណាស់! ពីព្រោះនៅសួនឧទ្យាន មនុស្សនឹងមិនវាយតប់គ្នា ឬធ្វើសង្គ្រាមទៀតឡើយ។ មនុស្សទាំងអស់នឹងស្រឡាញ់គ្នាទៅវិញទៅមក។ គ្មានអ្នកណាម្នាក់នឹងឈឺឬស្លាប់ទេ។ មនុស្សខ្វាក់នឹងមើលឃើញ មនុស្សថ្លង់នឹងស្តាប់ឮ ហើយមនុស្សពិការជើងនឹងរត់ហើយលោតបាន។ មនុស្សគ្រប់គ្នានឹងមានអាហារបរិបូរ។ បន្ថែមទៅទៀត សត្វទាំងអស់នឹងលេងជាមួយគ្នា ហើយយើងក៏អាចលេងជាមួយពួកវាបានដែរ។ មិនត្រឹមតែប៉ុណ្ណោះទេ មនុស្សស្លាប់នឹងរស់ឡើងវិញដូចជា រេបិកា រ៉ាហាប ដាវីឌ អេលីយ៉ានិងបុរសស្ដ្រីជាច្រើនឯទៀតដែលកូនបានរៀនក្នុងសៀវភៅស្ដើងនេះ។ ពួកគាត់ក៏នឹងរស់ឡើងវិញដែរ!
តើកូនចង់ជួបពួកគាត់ពេលពួកគាត់រស់ឡើងវិញឬទេ?—ព្រះយេហូវ៉ាស្រឡាញ់កូន ហើយចង់ឲ្យកូនសប្បាយ។ បើកូនបន្ដរៀនអំពីព្រះយេហូវ៉ា និងស្តាប់បង្គាប់លោក កូននឹងរស់នៅជារៀងរហូតក្នុងសួនឧទ្យានដ៏ស្រស់ស្អាត! តើកូនចង់រស់នៅក្នុងសួនឧទ្យានឬទេ?—