Abya wayuka bufumu bo tubena kwambapo nyi?— Ee, Bufumu bwa Lesa, kabiji bo Bufumu bukalula ino ntanda ke paladisa. Ubena kukeba kuyuka byavula pa buno bufumu nyi?—

Bufumu bonse bwikala na mfumu. Kabiji mfumu ulama bantu bekala mu kyalo kyanji. Abya wamuyuka mfumu wa Bufumu bwa Lesa nyi?— Yesu Kilishitu. Kabiji wikala mwiulu. Katatakatu akalamenga bantu bonse pano pa ntanda. Ubena kulanguluka’mba tukekala na lusekelo kimye Yesu kyo akekala Mfumu wa pano pa ntanda ponse nyi?—

Tukekala bingi na lusekelo. Mu Paladisa, bantu kechi bakalwanga nangwa kuya ku nkondo ne. Bantu bonse baketemwa. Kafwako ukakolwa nangwa kufwa ne. Bantu babula kumona bakatendeka kumona, babula kwamba bakatendeka kwamba, kabiji aba babula kwenda bakanyemanga ne kukilauka. Mukekala kajo kavula bingi. Kabiji banyama bakekala mu mutende na banyama bakwabo ne atweba bantu. Bantu bafwa bakasangulwa. Banabalume ne banabakazhi bavula bo wafundapo mu uno buku nabiji Libeka, Lehaba, Davida ne Elaija nabo bakasangulwa. Ukeba kukamonañana  nabo kimye kyo bakasangulwa nyi?—

Yehoba wakutemwa kabiji ukeba’mba wikalenga na lusekelo. Inge watwajijila kufunda pe Yehoba ne kumukokela, ukekala myaka ne myaka mu Paladisa wawama bingi. Nanchi bino byo byo ukeba nyi?—