န​ဆိကမိၣ်​လၢ ပ​တဲ​ဘီမုၢ်​ဖဲလဲၣ်​တခါ​လဲၣ်.— မ့ၢ်​လီၤ. တၢ်​န့ၣ်​မ့ၢ်​ယွၤ​အဘီ​အမုၢ်, ဘီမုၢ်​လၢ က​မၤ​ကဲထီၣ်​ဟီၣ်ခိၣ်​လၢ ပၤရဒံစူး​လီၤ. န​အဲၣ်ဒိး​သ့ၣ်ညါ​အါထီၣ် ဘီမုၢ်​အံၤ​အဂ့ၢ်​ဧါ.—

ဘီမုၢ်​ခဲလၢာ်​အိၣ်ဒီး အ​စီၤပၤ​လီၤ. စီၤပၤ​န့ၣ်​ပၢ​ပှၤလၢ​အိၣ်​လၢ အထံ​ကီၢ်ပူၤ​လီၤ. န​ဆိကမိၣ်​လၢ ယွၤ​အ​ဘီမုၢ်​အ​စီၤပၤ​က​မ့ၢ် မတၤ​လဲၣ်.— မ့ၢ်​ယ့ၣ်ၡူး​ခရံာ်​လီၤ. အဝဲ​အိၣ်​လၢ​မူခိၣ်​လီၤ. တယံာ်ဘၣ်​ဒီး အဝဲ​က​ကဲထီၣ်​ပှၤ​အိၣ်​လၢ ဟီၣ်ခိၣ်​ချၢ​ကိးဂၤ​ဒဲး​အ​စီၤပၤ​လီၤ. ဖဲ​ယ့ၣ်ၡူး​ပၢ​ဟီၣ်ခိၣ်​ဒီဘ့ၣ်​အခါ န​ဆိကမိၣ်​လၢ​ပ​သး​က​ခု​ဧါ.—

ပ​သး​က​ခု​ဒိၣ်မး​လီၤ. လၢ​ပၤရဒံစူး​အ​ပူၤ​န့ၣ်​ပှၤကညီ​တဖၣ် တ​အ့ၣ်လိာ်​အသး​ဒီး တ​ဒုးလိာ်​အသး​လၢၤဘၣ်. ပှၤ​ကိးဂၤ​ဒဲး​က​အဲၣ်လိာ်​အသး တဂၤ​ဒီး​တဂၤ​လီၤ. ပှၤ​တ​ဆူး​တ​ဆါ ဒီး​ပှၤ​တ​သံ​ဘၣ်​နီ​တဂၤ​လၢၤဘၣ်. ပှၤမဲာ်​တထံၣ်​တၢ် က​ထံၣ်က့ၤတၢ်, ပှၤလၢ​အ​နၢ်​တ​နၢ်ဟူ​တၢ် က​နၢ်ဟူ​က့ၤ​တၢ်, ပှၤလၢ​အ​ဟး​တ​သ့​က​ဃ့ၢ်​ဒီး က​စံၣ်​ဝဲ​လီၤ. တၢ်အီၣ်​တၢ်အီ​ကအိၣ် အါအါ​ဂီၢ်​ဂီၢ်​လီၤ. ဆၣ်ဖိ​ကီၢ်ဖိ​ကဒဲကဒဲ က​လိာ်ကွဲ​ဒ်သိး​သိး​ဒီး ပဝဲ​စ့ၢ်ကီး ပ​က​လိာ်ကွဲ​ဒီး​အီၤ​လီၤ. ပှၤသံ​သ့ၣ်​တဖၣ် က​မူထီၣ်က့ၤ​လီၤ. ပှၤလၢ​န​မၤလိ​ဘၣ် အဂ့ၢ်​လၢ​လံာ်​အံၤ​အ​ပူၤ ဒ်သိး​ဒီး​နီၢ်​ရံးဘကၤ, နီၢ်​ရၤဃး, စီၤ​ဒၤဝံး, ဒီး​စီၤအ့ၤလံယၤ က​မူထီၣ်က့ၤ​စ့ၢ်ကီး​လီၤ. ဖဲ​အဝဲသ့ၣ်​မူထီၣ်က့ၤ​အခါ န​အဲၣ်ဒိး​ထံၣ်ဘၣ်​အဝဲသ့ၣ်​ဧါ.—

 ယဟိဝၤ​ယွၤ​အဲၣ်​နၤ​ဒီး အဲၣ်ဒိး​လၢ​န​က​သးခု​လီၤ. န​မ့ၢ်မၤလိ​ယဟိဝၤ​ယွၤ​အဂ့ၢ် ဒီး​ဒိကနၣ်​အ​ကလုၢ် ထီဘိ​န့ၣ် န​က​အိၣ်မူ​ဘၣ်​လီၤထူ​လီၤယိာ်​လၢ ပၤရဒံစူး​ဃံလၤ​အ​ပူၤ​လီၤ. န​အဲၣ်ဒိး အိၣ်မူ​ဖဲ​န့ၣ်​ဧါ.—