Kani ulibwishi Ubufumu tulukulabilapo?— Inya, Bufumu bwa baLesa, Ubufumu ubukaalula icalo ukuba paladaiso. Kani ungafwaya ukwishibilapo na fimbi pali bubu Ubufumu?—

Ubufumu bonse lukoso buli ne mfumu. Kabili imfumu ilateeka abantu aba mu calo ca iko. Kani uliishi Imfumu ya Bufumu bwa baLesa?— Ni baYesu Klistu. Balekala kwiulu. Bukumo lukoso bakalukuteeka pa calo conse! Kani ulukulanguluka ati tukaba abasangalele ili baYesu bakaba Imfumu pa calo conse?—

Tukaba abasangalele ukwakuti! Mu Paladaiso, tamukabapo ukulwa. Fwense tukatemwanshanya. Tamukabapo uukalukulwala neli ukufwa. Impofu shikalaba, abashinkile amatwi bakomfwa, abalemene nabo bakenda ne kutolaaka. Bonse lukoso bakaba ne fyakulya ifyakuti ubwingi. Kabili inama tashikabapo ishikali ku shibyakwe na kuli fwebo. Abafwile bakabuuka. Abengi abalalume ne banakashi abo wasambililapo muli iino bloshuwa abali koti ni Libeka, Lakabi, Dafidi, na Elaija nabo bakabuuka!  Kani ungatemwa ukubabona ili bakabuuka?—

BaYehova balikutemenwe kabili balafwaya ati ube umusangalele. Kani wapitilisha ukusambilila pali baYehova ne kubomfwila, ukekala umuyayaya mu paladaiso iiweme! Kani ifyo efi ulukufwaya?—