Mvuhˇ miˬ hkʼaˬ ve le, nawˬ dawˇ kʼoˆ gʼa˗aw laˇ.— Cawˇ ve yoˬ. Gʼuiˬ sha ve Mvuhˇ miˬ hpehꞈ ve yoˬ. Mvuhˇ miˬ chi ve miˬ guiˬ hkʼoˆ paˍraˍdiˇsuˆ hko teˇ pawˆ kʼawꞈ hpehꞈ la tcuh tuˬ yoˬ. Mvuhˇ miˬ awˬ lawn chi htaꞈ nawˬ henˇ shiˍ maˇ la gaˇ laˇ.—

Mvuhˇ miˬ teˇ peˆ le le hkunˉ hawˉ hkanˇ cawˬ ve yoˬ. Hkunˉ hawˉ hkanˇ lehˬ yawˇ ve mvuhˇ miˬ yaˇ htaꞈ uˉ peunˍ ve yoˬ. Nawˬ shiˍ˗aˬ laˇ, Gʼuiˬ sha ve Mvuhˇ miˬ hkʼaw a shu Hkunˉ hawˉ hkanˇ hpehꞈ ve le.— Yeˍsuˆ Hkriꞈ hpehꞈ ve yoˬ. Yawˇ mvuhˇ naw ma hkʼoˆ lo chehˇ ve yoˬ. Maˇ maw maw kʼo, yawˇ miˬ guiˬ hkʼoˆ chehˇ ve chaw yaˇ teˇ gʼaˇ le le htaꞈ uˉ peunˍ tuˬ yoˬ. Nawˬ dawˇ kʼo, miˬ guiˬ hkʼa peu˗eˬ hkʼoˆ Yeˍsuˆ Hkunˉ hawˉ hkanˇ te htaˇ, ngaˬ hui dawˇ sha ha lehˬ tuˬ laˇ.—

Ngaˬ hui dawˇ sha ha lehˬ jaˇ tuˬ yoˬ. Paˍraˍdiˇsuˆ hkʼaw chaw yaˇ maꞈ maˇ kʼawꞈ bawˆ daꞈ ve yoˬ. Teˇ gʼaˇ le le haꞈ daꞈ pehnˇ daꞈ ve yoˬ. Chaw teˇ gʼaˇ kaꞈ maˇ naˬ maˇ suh. Mehˆ cuˉ ve chaw mehˆ kʼawꞈ mawˬ ve, naˍ paw pawˇ ve chaw kʼawꞈ kaˇ puiˉ la ve, hkui luˬ paˍ pawˆ toˇ gʼa tuˬ yoˬ. Teˇ gʼaˇ le le awˬ pon caˇ tuˬ dawˬ tuˬ hkʼa biˇ cawˬ ve yoˬ. Leh to nuˇ to shaˆ htaˇ daꞈ leh ngaˬ hui kaꞈ yawˇ hui geh leˍ guiˇ gʼa ve yoˬ. Suh peuˬ ve chaw kʼawꞈ teꞈ tu la ve yoˬ. Liꞈ chi teˇ kʼoˆ awˬ hkʼaw lo kʼoˆ taˍ ve hawˉ hkʼaˆ yaˇ miˇ, Reˍbehˆkaꞈ, Raˍhaˆ, Eˇliˇyaꞈ, leh Daˍviˆ htawˇ kʼawꞈ teꞈ tu la tuˬ yoˬ. Yawˇ  hui teꞈ tu la htaˇ, nawˬ yawˇ hui htaꞈ mawˬ daꞈ gaˇ laˇ.—

Yaˬhoˉvaˬ nawˬ htaꞈ haꞈ leh dawˇ sha ha lehˬ tcuh gaˇ ve yoˬ. Nawˬ Yaˬhoˉvaˬ ve awˬ lawn htaꞈ henˇ tcuhˉ taˍ leh yawˇ hkawˇ htaꞈ na yuˬ ve kʼo, daꞈ jaˇ ve Paˍraˍdiˇsuˆ hko hkʼaw co co taiˍ taiˍ teꞈ chehˇ tuˬ yoˬ. Nawˬ oˇ hkʼe heuˆ gaˇ ve laˇ.—