Mani a gesi una be edena Basileia ta herevalaiamu?​— Oibe, una na Dirava ena Basileia, una Basileia ese tanobada na paradaiso ai be halaoamu. O uramu una Basileia ba dibaia?​—

Basileia iboudiai na mai pavapavadia. Bona pavapava ese ena gabu taudia e lohiadiamu. Oi mai dibamu Dirava ena Basileia Pavapavana be daika?​—⁠ Una na Iesu Keriso. Ia na gubai e nohomu. Kahirakahira ia ese tanobada taudia iboudiai be lohiadiamu! Iesu ese tanobada ibounai be lohiaiamu neganai, o laloamu ita baita moalemu?​—

Oibe, baita moale dikadikamu! Paradaiso ai, taunimanima na basie heatumu bona basie tuarimu. Taunimanima iboudiai na be helalokau hehenimu. Ta basine gorereamu eiava basine masemu. Matakepulu taudia matadia be namomu, taia kudima taudia taiadia be namomu, asie rakamu taudia be rakamu. Taunimanima iboudiai edia aniani na be momo hereamu. Animal na be gadara heboumu bona ita danu idia ida baita gadaramu. E mase taudia momo na be mauri loumu. Ina buklet ai o dibadia taudia heḡereḡere, Rebeka, Rahaba, David  bona Elia danu be mauri loumu! Idia be mauri loumu neganai, o uramu ba hedavari henidia?​—

Iehova na oi e lalokau henimumu bona e uramu ba moale. Bema Iehova ba dibaia bona ba kamonai henia, oi na paradaiso mai hairana ai bo mauri hanaihanaimu! Oi danu o uramu?​—