Kwõjel̦ã ke Aelõñ ak Kien ta eo enaaj lale armej ro?— Ej Kien eo an Anij me enaaj kõm̦m̦an bwe lal̦ in en erom pedetaij. Kokõn̦aan ke kal̦apl̦o̦k am̦ jel̦ã kõn Kien in?—

Aolep Aelõñ ewõr kiiñ ie. Im eo ej kiiñ ej lale aolep armej ro ilo ãneo ãnen. Kwõjel̦ã ke wõn eo ej Kiiñ ilo Aelõñ ak Kien eo an Anij?— Jijej Kũraij. Ej pãd ilo lañ. M̦õttan jidik, enaaj Kiiñ ñan aolep armej in lal̦ in! Ñe Jijej enaaj Kiiñ in aolepen lal̦ in, jenaaj ke m̦õn̦õn̦õ?—

Jenaaj lukkuun m̦õn̦õn̦õ! Ilo Pedetaij, armej ro reban bar ire im tarin̦aeik doon. Aolep renaaj yokwe doon. Ejjel̦o̦k enaaj bar nañinmej im mej. Armej ro repilo renaaj loe aolep men. Ro rejarroñroñ renaaj roñ ainikien ko. Ro rejaje etetal renaaj ettõrto ettõrtak im ekkãke. Enaaj bwijin kijen aolep armej m̦õñã. Menninmour ko renaaj iukkure ippãn doon im jenãj iukkure ippãer. Armej ro me rar mej, renaaj bar mour. Em̦m̦aan im kõrã ro kwaar katak kake er ilo bok in renaaj  bar mour. Kain en̦ an Rebeka, Rehab, Devid, im Ilaija! Kokõn̦aan ke jel̦ã kajjier ñe rebar mour?—

Jeova elukkuun yokwe eok im kõn̦aan bwe kwõn m̦õn̦õn̦õ. Ñe kwõj katak wõt kõn Jeova im pokake e, kwõnaaj mour ñan indeeo ilo jikin eo eaiboojoj, pedetaij! Kokõn̦aan ke mour ilo pedetaij?—