Wuzye ukwelengaanya kuno Awufuumuci wuno tukulandaapo?— Molimonye, Awufuumu wakwe Leza wuno wulileenga insi ukuwa e paradise. Wuzye ungakuunda ukumaanya ivivuule pakwe woo Uwufuumu?—

Uwufuumu wonsinye wukaawa ni mfuumu, swinya imfuumu ikateeka awaantu wa muunsi yakwe. Wuzye ungamaanya wino aliwa Amfuumu ya mu Wufuumu wakwe Leza?— We Yesu Klistu swinya akakwikaala kwiyuulu. Nombanye ali nukuwa Amfuumu pa waantu wonsinye muunsi! Wuzye ukwelengaanya kuno tuliwa nicimwemwe pano e Yesu aliwateeka insi yonsinye?—

Acakusimiciila, tuliwa nicimwemwe nkaninye! Mu Paradise awaantu wataliwaalwa nanti ukuya ku nkondo na swinya. Awaantu wonsinye walikundaana. Kutaliiwa wino alilwaala nanti ukufwa. Intoonko ziliwaloola, na wakuutwi waliwa kwiivwa. Na swinya wano wasipiita walisamaala nukuzintuuka. Umuuntu uwili wensinye aliwa nivyakuulya ivivuule. Ivinyaama viliwa pawuciwuuza nivinyaama viwuuye, nga swinya viliwa pawuciwuuza nasweeswe. Awaantu awaafwe walizyulupuuka. Awoonsi na wanaaci wano tusambiliziile mwe kaa akalibuuku poonga ndivino e Rabeka, e Rahabu, e Davidi nu Eliya nawonye walizyulupuuka!  Wuzye ungakuunda ukuti mwiize mulolaane nawo pano walizyulupuuka?—

E Jehova wakukuunda swinya akaloonda ukuti uwe nicimwemwe. Ndiwatwaliliila ukusambiliila pe Jehova nukumwivwiila, uliyikaala umuyayaya mwe paradise! Wuzye vyoo asavyo ukaloonda?—