We onnawerya waanyiherya Omwene taani yoowo hiyaano nnalocaahu?— Aayi, owo ti Omwene wa Muluku, Omwene onahaala weeriha wi elapo yavathi ekhale parataiso. We onnachuna ohuserya sincipale vooloca sa Omwene yoola?—

Omwene ori woothene onnakhalano Mwene aya. Nave tho Mwene onnaalamulela achu a elapo awe. We woomusuwela taani Mwene a Omwene wa Muluku?— Ti Yesu Kiristu. Owo onakhala wirimu. Moohilekela owo onahaala okhala Mwene a oothene veelaponi yavathi! We onuupuwela wi nnahaala okhala oohakalala Yesu akhala Mwene a oothene hiyo veelaponi?—

Hiyo nnamukhala oohakalala vancipale! Mparataiso, achu hekawana nari herwa tho enawaniha ikhoco. Oothene anahaala osivelanaka mukina ni mukhwaawe. Haavovo onahaala wiiceliwa nari okhwa. Achu ohoona anahaala woona, achu ohiiwa anahaala wiiwa, ni yaale ahinawerya weeca anahaala ochimaka ni ocupha. Oothene anahaala okhalano soolya sincipale. Nave axinama anahaala okhala asinthamwene mukina ni mukhwaawe vamoha ni hiyo. Achu yaawo yaakhwile anahaala okookela okhala ni okumi. Alopwana ancipale ni athiyana omanlaawe ohuserya vooloca sa yaawo mu liivuru yoola ntoko Repeka, Rahabi, Tavite ni Eliya, anahaala tho okookela okhala ni okumi!  We onnachuna waasuwela yaawo yakookela okhala ni okumi?—

Yehova onnoosivela nave onachuna wi we okhale oohakalala. We watitelela ohuserya vooloca sa Yehova ni omwiiwelela yoowo, onahaala okhalano okumi okhala wookhala mu parataiso ooreeraxa! Ti yeeyo we onachunaawe?—