¿Tikmatstika itech tlen Tekiuajyotl titlajtotokej?... Kema, iTekiuajyo toTajtsin. Yejuin Tekiuajyotl kikuepas tlaltikpaktli se xochitlalpan. ¿Tikuelitaskia tikmatis okseki itech yejuin Tekiuajyotl?...

Nochi tekiuajyotl kipiya se tekiuaj. Yejon tekiuaj kinyekana nochimej tlaltikpakchanejkej akin ompa chantij. ¿Tikmatstika akinon tekiuaj itech iTekiuajyo toTajtsin?... Kema, Jesucristo. Yejua chanti ne iluikak. ¡Xok uejkauis ika Tekiuaj yes ipan nochi tlaltikpaktli! ¿Tiknemilia tinemiskej ika toyojlo ijkuak Jesús tekiuajtis?...

Kema, ¡tinochimej melak tiyolpakiskej! Ipan Xochitlalpan, tlaltikpakchanejkej xok nouisokiskej, xok kualoskej nion xok mikiskej. Akin xtlachiaj tlachiaskej, akin xtlakakij tlakakiskej niman akin xuelij nejnemij uelis notlaloskej niman tsikuiniskej. Nochimej kipiyaskej tlen kikuaskej. Se yolki xkikuas okse yolki, nochimej yolkamej san sekan nemiskej niman kuajli nemiskej iuan tlaltikpakchanejkej. Akin yomijkej tlachiaskej niman nokuiteuaskej. ¡Miyekej tlakamej niman siuamej akin otikinteneujkej ipan yejuin amatlajkuilojli ken Rebeca, Rahab, David  niman Elías noijki oksejpa yoliuiskej! ¿Tikuelitaskia imiuan titlajtlatos ijkuak oksejpa nemiskej?...

Jehová melak mitstlasojtla niman kineki xnemi ika pakilistli. Tla timomachtia itech Jehová niman tiktlakamati, ¡uelis tinemis nochipa ipan se kualtsin xochitlalpan! ¿Tikuelitaskia tinemis ompa?...