FAMAHA’Ö 14
Banua Lowalangi Zamatörö zi Sagörö Ulidanö
Tafaha’ö ita iada’a sanandrösa ba wamatörö. Ö’ila hadia Wamatörö da’ö?— Atulö, Famatörö Lowalangi. Da’ö zombali’ö faradaiso zi sagörö ulidanö. Hadia omasi öfaha’ö ndra’ugö sanandrösa ba Wamatörö andrö?—
Ero sambua famatörö so razonia. Ya’ia zamatörö niha ba mbanua andrö. Ö’ila haniha Razo ba Wamatörö Lowalangi?— Yesu Keriso. Ba zorugo toröi ia. Lö aratö tobali ia Razo ba niha gulidanö! Molo’ö ya’ugö, hadia ohahau dödöda na Yesu zamatörö ba gulidanö?—
Hadia zomasi’ö öfalua ba Waradaiso dania?
Hasambalö ohahau dödöda! Lö niha si fa’udu-udu ba si fasuwö ba Waradaiso. Fefu niha faoma la’omasi’ö nawöra. Lö fökhö ba fa’amate. Teboka hörö zau’a, teboka dögi dalinga zafiso. Manaoka niha si no ombuyu-mbuyu töla. Fahöna mbalazo. Fahuwu niha ba gurifö, lö lafakao ita sa’e. Tesusugi niha si no mate, simane Rebeka, Rakhaba, Dawido, ba Elia si no tafaha’ö ya’ita ba zilalö. Ifuli auri ira! Hadia omasi’ö falukha khöra dania?—
I’omasi’ö sibai ndra’ugö Yehowa. Omasi ia na ohahau dödöu. Na öfaha’ö ndra’ugö sanandrösa khö Yehowa ba ö’o’ö linia, auri ndra’ugö ba waradaiso si sökhi sibai! Hadia omasi’ö auri ba waradaiso?—
